Komunikazioa

RTVEk kamera ezkutuen debekua sartuko du bere estilo liburuan

Berriki, Espainiako Auzitegi Konstituzionalak kamera ezkutuen erabilera debekatu du

U.U. -

2012ko otsailak 23
Otsailaren 6an Espainiako Auzitegi Konstituzionalak aurreneko aldiz «ilegitimotzat» jo zuen kamera ezkutuen erabilera kazetaritzan. «Kamera ezkutuaren grabaketa kazetariak erabiltzen duen engainu bat da, eta testuinguruaren araberako nortasun bat antzezten du», azaldu zuen sententziak. Canal Mundo ekoizpen etxearen afera bati erantzuten zion Auzitegi Konstituzionalak, estetizista batek jarritako salaketaren harira. Ekoizpen etxeko kazetari bat estetizista horren kontsultara joan zen bezero bat izango balitz bezala, kamera ezkutu batekin. Auzitegi Konstitzionalak babesa ukatu zion Canal Mundori eta Valentziako kate autonomikoari, grabatua izan zen pertsonak ez zuelako aukera izan esateko grabazioa emititu zitekeen ala ez.

Sententziari helduta, RTVEko administrazio kontseiluak erabaki du liburu estilotik kentzea kamera ezkutuen erabilera egiteko aukera. Hortaz, debekatzea. RTVEko estilo liburuaren arabera, soilik kasu berezietan erabil zitezkeen kamera ezkutuak. «Interes publikoari eragiten dioten legez kanpoko eta delitu praktikak daudela erakusteko. Eta zuhurtasunez lan egiteko baldintzarekin, informatzaileek dituzten mugen jakitun izanda». Salaketa bat probatzeko «azken baliabide» gisa onartzen zen kamera ezkutuak erabiltzea.

Administrazio kontseiluaren erabakiz, estilo liburuan punto batean zehaztuko da kazetariek ezin dutela kamera ezkutuen metodoa erabili. Eta ezabatu egingo dira nola erabili behar ziren zehazten zuten artikuluak.

Espainiako kate pribatuek, berriz, ez diote oraindik erantzun Auzitegi Konstituzionalak emandako sententziari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna