Magia

(BERRIAko ikerketa sailak Espainiako banketxe bateko bi zuzendariri grabatutako telefono elkarrizketa)

- Zorionak, Jose Ignazio. Bikaina izan zuan lehengo egunekoa. Bejondeiala!

- Eskerrik asko, Rodrigo, baina ez duk hainbesterako…

- Baita zera ere! Mundiala izan zuan, benetan, inoiz ikusi dudan ikuskizunik onena. Jada egun batzuk pasatu dituk eta oraindik barre egiten diat… «Ikusle maiteok… ta-txan-ta-txan… orain 309 arrautza daude kapelan… ta-txan-ta-txan… orain 2.900 arrautza falta dira…» Mundiala!

- Onenekin lan egitea duk kontua.

- Eta onena bukaeran, kapelari buelta eman, eta hik serio-serio ikusleei: «Dakizuenez, gure tortilla ikaragarri handia da eta zuen arrautzak behar ditugu, gutxi batzuk baino ez… 23.000 arrautza inguru… hasi hementxe jartzen…». Barrez lehertu beharrean egon ninduan.

- Eta ikusleek eman, txintxo-txintxo, pepelerdoak halakoak…! Ozta-ozta eutsi nioan barregurari.

- Eta Mariano txaloka…. Benga, konta iezadak…Nola egin huen?

- Ezin diat ezer esan, badakik.

- Ados, baina behintzat esadak nork zuzendu zuen ikuskizuna... David Copperfield-ek? Houdini handiaren semeak? Txan magoak, akaso? Euskaldunok elkarri laguntzeko joera handia duzue…

- Ezetz, ba…

- Tira, ez haserretu… hurrengoan adi-adi egongo nauk…

- Uste baino lehenago izango duk aukera…

- Eta harrapatuko haut, Jose Ignazio, harrapatuko diat hire trikimailua…

- Ez diat uste…

(Erredakzioan itzulia)