BOS eta EOS orkestrak fusionatzea proposatu dio Bilbaok Urkulluri

BOS Bilbao Orkestra Sinfonikoa eta EOS Euskadiko Orkestra Sinfonikoa fusionatzeko proposatu dio Jose Luis Bilbao Bizkaiko diputatu nagusiak Iñigo Urkullu Eusko Jaurlaritzako lehendakariari. Bizkaiko Aldundiak kudeatzen du BOS, eta Jaurlaritzak EOS. Berri agentziek zabaldu dutenez, orkestra biak «traumarik gabe fusionatzeko urratsak egiten hasteko eskaera formala» egin dio Bilbaok Urkulluri. Euskadiko Orkestra Nazionala deitzea proposatu du. Eragile politiko nahiz sozialekin hasi duen bilera txandaren barruan hartu zuen, atzo, Urkulluk Bilbao. Ez zen hori izan eskaera bakarra. Bilboko Guggenheim museoa kudeatzeko AEBetako Solomon R. Guggenheim fundazioarekin aldundiak zein Jaurlaritzak duten hitzarmena «denbora mugarik gabe luzatzeko» eskatu zion, halaber. Baita Urdaibaiko Guggenheim egiteko proiektua abian jartzeko ere berriz. Patxi Lopezen Jaurlaritzak itxi zion bidea egitasmo horri.