Noiz sortua: 2013-04-14 00:30:00

Saskibaloia. Eurokopako finala: Uxue Bilbo Basket 64. Lokomotiv Kuban 75

Beste orbain bat

Bilbo Basketek ezin izan du Lokomotiven jokoa eta ahal fisikoa gelditu, eta partida handietan duen ezina azaleratu du berriro

Bilboko taldeak presaka jokatu du, eta zentzu baino adore gehiago erakutsi du

Imanol Magro - Berriemaile berezia

2013ko apirilak 14

Uxue Bilbo Basket. Zisis (4), Mumbru (10), Vasileiadis (16), Hervelle (2), Hamilton (4) —hasierako bostekoa—; Raul Lopez (5), Rakovic (11), Moerman (8) eta Grimau (4).

Lokomotiv Kuban. Calathes (10), Kalnietis (10), Jasaitis (7), Brown (11), Hendrix (14) —hasierako bostekoa—; Maric (12), Savrasenko, Bikov (7) eta Baron (4).

Markagailua. 17-16, 30-38 (atsedenaldian); 45-54 eta 64-75.

Epaileak. Rocha, Sahin eta Lottermoser. Ez zuten inor kanporatu.

Bestelakoak. 3.862 ikusle Charleroiko Spiroudome pabiloian (Belgika). Uxue Bilbo Basketeko jarraitzaileak izan ziren nagusi harmailetan: 2.000tik gora bildu ziren. Lokomotivek Kubanekoak mila eskas ziren.

Buruz eta gorpuz gutxiago izan zen. Adorea, kuraia, izaera... hitz batean, bihotza gehiago erakutsi zuen Bilbo Basketek, baina finaletan saskibaloiak xakearen antza gehiago du borrokarena baino, eta atzo, Lokomotivek hobeto erabili zituen bere piezak. Fisikoki pieza hobeak zituen, eta nabaritu zen, defentsan bereziki. Burua, aldiz, erasoan, baloia ondo mugitu, jokalari aproposa aurkitu eta uztaira gerturatuz. Bilbo Basketek, aldiz, boladaka erantzun zuen, anabasan aurrera eginez. Baina horrekin ez da aski, eta Charleroi inbaditu zuten zaleek burumakur egin zuten itzulerako bidaia, euren azaletan denbora luzean erremina sortuko dioten orbain berriari begira.

Bilbo Basketek ez zuen ondo jokatu. Egun garrantzitsuenean gauzak ez zitzaizkion irten. Lokomotivi, aldiz, bai. Fotis Katsikarisek atzean antolaturiko ekuazioa ondo argitu zuen. Bilbo Basketek, aldiz, ez zuen saskirako bidea aurkitu. Adoreari hirukoak gehitu zizkionean kolpeak erantzun zituen, baina erasoko argia joan zenean Lokomotiven atzetik korrika joan zen. Badirudi Bilbo Basketek zama handia duela egun handiekin, eta beste behin kirioak kontrolatzea kosta izan zitzaion. Partida garrantzitsu asko galdu ditu honezkero eta oroitzapeneko mamuak handitzen doaz.

Lokomotivek ez zuen inork espero ez zuenik egin. Calathes ondo zaindu zuen Bilbo Basketek hasieran eta Kalnietisek barnekaldien bitartez hartu zuen puntuak pilatzeko ardura lehen laurdenean (3-10). Partida gaizki hasi zen, baina Fotis Katsikarisek Lopez kantxaratu eta haren gidaritzapean Bilbo Basketek kolpea erantzun zuen. Jaurtitzaileak bilatu, aurkitu, eta Bilbo Basketek aurretik bukatu zuen lehen laurdena hiru hirukori esker (17-16).

Lokomotivek estutu egiten zuen, eta hirukoak ziren arnasbidea. Apustu arriskutsua da baina, eta errusiarren defentsa gogorra oztopo handiegi bilakatu zen. Bilbo Basketek giharrekin egin zuen talka. Moermanek eta Grimauk launa puntu sartu zituzten —Katsikarisek saskipean sartzeko agindu zien Mumbru eta Grimauri, Jasaitisen aurka buruz buru joka zezaten—, baina ez zen aski Hendrix —partidako jokalari onenaren saria jaso zuen: 14 puntu eta 9 errebote—, Brown eta Saric saskipean egiten ari ziren triskantza erantzuteko. Lokomotiven pibotak askoz gehiago izan ziren partida guztian. Atsedenaldian, zortzi azpitik (30-38).

Argia behar zuen Bilbo Basketek aurrean zuen taldeari eusteko, eta Vasileiadisek bakarrik aurkitu zuen. Baloia erretzen zuenak greziarrak eskatu egin zuen. Ausarta da, asko gainera, finaletan jokatzeko behar den ezpal horrekin eginikoa da. Kideak urduri eta baloia pasatzen ikusita bere burua eskaini zuen jokaldi guztietan eta zortzi puntu sartu zituen. Mumbru, Hervelle eta enparauak, berriz, ez ziren agertu. Lokomotivek,berriz, sendotasuna eta zentzua erakusten zuen, erabaki zuzenak hartu eta jokaldiak lotzeko ahalmena. Ikusgarria izan zen Hendrix, Brown eta Saricek elkar aurkitzeko izan zuten abilezia (64-75).

Balentria urrun zegoen. Partida oso aldapa gora. Harmailetan ere miraria ezinezkoa zela sinesten ari zenean Bilbo Basketek oldarraldia izan zuen. Burua agertu zen, eta haren eskutik 8-0eko partziala (50-57, 38. min.). Lokomotiv nekea sumatzen hasten ari zela zirudien, eta Rakovicek aldea are gehiago murrizteko aukera izan zuen saskipean bakarrik gelditu zenean. Baina kale egin zuen, eta hor bukatu zen ilusioa. Ezinezkoa zen, eta beranduegi zen ordura arte gaizki eginikoak zuzentzeko. Calathes izan zen borreroa amaieran. Bilbo Basketek beste final bat galdu du, baina zaleek txalo artean agurtu zituzten jokalariak. Horiek bai heroiak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 28an eguneratua, 18:00etan. ©BERRIA

Koronabirusaren azken datuak

Berria

Azkeneko 24 orduetan hiru pertsona hil dira COVID-19 gaitzaren eraginez, 23 positibo atzeman dituzte PCR probekin, eta sei gaixo ospitaleratu dituzte. Euskal Herrian 28.976 gaixok eman dute positibo guztira, koronabirusa atzemateko probaren bat eginda. Horietatik 2.037 hil dira. Grafikoak, albiste barruan.

Baionako ospitalea, artxiboko irudi batean. ©Guillaume Fauveau

Mugak irekitzeko eskariak ugaritu egin dira

Berria

Edouard Philippek aipatu du mugako kontrolak kentzeko aukera. Ekainaren 15etik aitzinera izanen litzateke. Iñigo Urkulluk eta Alain Roussetek eskari horixe egin dute; Urkullu Espainiako presidenteari zuzendu zaio, eta Rousset, Frantziakoari, gutun bidez. «Akitania Berria-Euskadi-Nafarroa Euroeskualdean mugaz gaindiko mugikortasuna errazteko» eskatu diete. Nafarroako Gobernuak ere bat egin du eskari horrekin.

Gipuzkoaren eta Lapurdiren arteko mugako saltokiak. Muga ekainaren 15ean zabaltzea «litekeena» dela esan du Edouard Philippe Frantziako lehen ministroak. ©Jon Urbe / Foku

Ipar Euskal Herria bigarren fasean sartuko da ekainaren 2tik aitzina

Oihana Teyseyre Koskarat

Ostatuak zabalduko dituzte, baina neurri zorrotzak errespetatzeko baldintzarekin. Hirugarren fasea ekainaren 22an hastea espero dute.

Irun eta Hendaia arteko muga, apirila erdian ©Guillaume Fauveau

«Mugaz gaindiko mugikortasuna zabaltzeko» eskatu dute Urkulluk eta Roussetek

Berria

Gutun bat bidali dio Iñigo Urkullu EAEko lehendakariak Espainiako Gobernuko presidenteari, «Akitania Berria-Euskadi-Nafarroa Euroeskualdean mugaz gaindiko mugikortasuna zabaltzeko». Gutun beraren kopia helarazi dio Alain Rousset Akitania Berriko presidenteak Edouard Philippe Frantziako Gobernuko lehen ministroari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna