Finantzen Euskal Kontseiluak gaur kitatuko du iazko zerga urte oparoa

Espero baino gehiago bilduta, diru horrekin zer egingo duten jakinaraziko dute. ELAk gizarte politiketara bideratzea nahi du
Urrian egin zuen azken bilkura Finantzen Euskal Kontseiluak.
Urrian egin zuen azken bilkura Finantzen Euskal Kontseiluak. JUANAN RUIZ / ARGAZKI PRESS

Irune Lasa -

2018ko otsailak 13
Jaurlaritzak eta Arabako, Bizkaiko eta Gipuzkoako ogasun sailek bilkura dute gaur arratsaldean Lakuan, Finantzen Euskal Kontseiluan. Iazko zerga urte oparoaren kitapena eta aldundien ekarpenak izango dituzte erabakitzeko. Zergetan espero baino diru gehiago bildu dutenez, diru gehigarri hori zertara joango den ere ezarriko dute. Hala ere, ezaguna da diru gehigarri horren zati handiena zorra ordaintzeko izango dela. Pedro Azpiazu Ogasun sailburuak, izan ere, azaldu du Jaurlaritzak 729 milioi eurotatik 434 milioi zorra murriztera bideratuko dituela.

Baina eragile guztiak ez daude erabaki horren alde. Gaurko bilera dela eta, ELA sindikatuak dei garbia egin dio Finantzen Euskal Kontseiluari: aurreikusitakoa baino 976 milioi euro gehiago bildu dituztenez, bidera dezatela diru hori gizarte politiketara; sozietate zergaren jaitsiera eteteko ere eskatu dute. Hots, Jaurlaritzak eta aldundiek ez dezatela Espainiatik ezarritako gastu araua bete euren aurrekontuetan.

Gastu arau horrek aurrekontuak handitzeko %2,4ko muga ezartzen die erkidegoko administrazioei. Diru bilketa espero baino handiagoa bada, diru gehigarri hori zorra ordaintzeko erabiltzera behartuta daude haiek. ELAk azaldu duenez, gastu arau hori «ez zen izango indarrean EAJren aldeko botoa jaso izan ez balu».

Arabako, Bizkaiko eta Gipuzkoako ogasunen diru bilketa handiago hori oso-osorik osasuna, hezkuntza eta beste zerbitzu publikoak eta gizarte laguntzak hobetzeko erabiltzea exijitu dio sindikatuak Finantzen Euskal Kontseiluari. «Horretarako, 2018ko aurrekontuak aldatu egin behar dira, eta aurrekontu igoerak zehaztu».

Sindikatuaren arabera, «hala ere, gastu arauak ematen du aukera aurrekontu muga hori gainditzeko, baldin eta diru sarrera handiagoak ekarriko lituzkeen zerga erreforma bat egiten bada». Aldiz, Araba, Bizkai eta Gipuzkoan «sozietate zerga lau puntu jaistea adostu dute EAJk, PPk eta PSE-EEk». Jaitsiera hori geldiarazi dadin nahi du ELAk. «Lehenik, jaitsiera horrek diru bilketan duen eragina kalkulatu behar da». Sindikatuak azaldu duenez, «zenbait adituren arabera, patronalari egindako oparia 200 milioi eurokoa izan daiteke». Eta «behar den zerga erreformak» tasa handiagoak ezarri behar dizkie «enpresen etekinei, errenta handiei eta kapitalari».

84,5 milioi euro gutxiago

Hain zuzen, Jose Maria Iruarrizagak Bizkaiko ogasun diputatuak jakinarazi du sozietate zergaren murrizketa zenbateko ondorioa izango duen herrialdeko zerga bilketan. EAJk, PSE-EErekin eta PPrekin adostutako murrizketarekin, eta 2016ko datuak oinarri hartuta egindako simulazio baten arabera, Bizkaiko Ogasunak, orotara, 84,5 milioi euro gutxiago bilduko lituzke sozietateen gaineko zergarekin.

Enpresa ertain eta handientzako %28tik %24rako murrizketak 1.000 bat enpresari egingo lieke mesede, eta, guztira, 69,2 milioi euro gutxiago ordainduko lituzkete. Enpresa txikiei sozietate zerga %24tik %20ra murriztuko zaie bi urtean, eta, ogasunaren simulazioaren arabera, neurriak 7.686 enpresari eragingo die. Guztira, 15,2 milioi euro aurreztuko dituzte enpresa horiek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna