Espainiako Gobernua: «Ez da sezesiorako erreferendumik izanen»

Madrilek dio prest dituela Kataluniako Parlamentuak onartzeko dituen legeentzako helegiteak. Rajoy Trumpekin elkartuko da hilaren 26an
Iñigo Mendez de Vigo Espainiako Gobernuaren bozeramailea, atzo, Madrilen.
Iñigo Mendez de Vigo Espainiako Gobernuaren bozeramailea, atzo, Madrilen. EMILIO NARANJO / EFE

Mikel Rodriguez

2017ko irailak 2
Kataluniako independentziari buruzko erreferendumerako atzerako kontua azken hilabetean sartu da. Jordi Turull Presidentetzako kontseilari eta gobernuko bozeramaileak erran du «denboraren kudeaketa» Generalitateak kontrolatzen duela, «urriaren 1ean botoa emanen dela bermatzeko». Turull Euskal Herrian izan zen, eta Josu Erkoreka Eusko Jaurlaritzaren bozeramailearekin elkartu zen Bilbon. Espainiako Gobernuak, ordea, lasai dagoela irudikatu nahi izan du bertze behin: «Urriaren 1ean ez da sezesiorako erreferendumik izanen», adierazi zuen atzo Iñigo Mendez de Vigo bozeramaileak, Ministroen Kontseiluaren ondoren. Mendez de Vigoren arabera, Madrilek aztertuta ditu «egoera posible guztiak», eta prest ditu indar independentistek erreferenduma baino lehen onartu nahi dituzten legeen aurkako helegiteak.

Kazetariek Mendez de Vigori galdetu zioten Espainiako Gobernuak zein neurri zehatz hartuko dituen, baina bozeramaileak ez zuen erantzun. «Kataluniarrek lasai egon behar dute, kataluniar, espainiar eta europar izaten segituko dutelako». Erreferendumaren astean, hilaren 26an, Mariano Rajoy Espainiako presidentea Donald Trump AEBetakoarekin elkartuko da Etxe Zurian.

Erreferendum Legea eta Trantsizio Legea onartzeko ditu Kataluniako Parlamentuak. Heldu den asteazkenean, osoko bilkura eginen du, baina Turullek atzo ez zuen zehaztu bi legeak edo legeren bat eztabaidatu eta bozkatuko ote duten. Hala ere, ziurtatu zuen «72 parlamentarientzat [Junts Pel Si eta CUP koaliziokoentzat]» ez dela arazo bat izanen, «ohore bat baizik».

Katalunian erreferendumaren aurka lerratu diren alderdiek, ordea, presioa handitu nahi diote Generalitateari. Miquel Iceta PSCko buruak erran du «deskonexiorako legeak» bozkatzeko ordua ailegatzerakoan, haren alderdiko ordezkariek parlamentutik alde eginen dutela. Catalunya Si Que Es Potek asteartean erabakiko du jarrera. Koalizio horren kide da Espainiako Podemos alderdiaren adarra, eta ez duela Erreferendum Legearen aurka bozkatuko errana du. Diada egunean (hilaren 11n), ekitaldi bat eginen du «Kataluniaren burujabetza» aldarrikatzeko, En Comu Podem koaliziokideekin batera. Pablo Iglesias Podemosen idazkari nagusiak parte hartuko du.

CIAren ustezko abisua

CIAk Bartzelonan atentatu bat jasateko arriskuaz ustez mossoei bidali zien oharra dela eta, Mendez de Vigok Carles Puigdemont Kataluniako presidenteari eskatu dio «argitzeko» AEBetako informazio zerbitzuaren abisurik jaso ote zuten. Turullek, ordea, bukatutzat eman nahi izan du eztabaida. «Norbaitek iradoki nahi badu atentatua eragotz zitekeela, izan dezala adorea eta erran dezala».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna