Albistea entzun

Tolosaldeko uzta oparoa

Bost eguneko tartean hiru pilotari gaztek egingo dute debuta profesionaletan: Iñaki Artola alegiarrak, Jokin Altuna amezketarrak eta Julen Urruzola asteasuarrak.
Iñaki Altuna, Jokin Artola eta Julen Urruzola. Debuta egiteko eguna iristeko irrikan daude hirurak.
Iñaki Altuna, Jokin Artola eta Julen Urruzola. Debuta egiteko eguna iristeko irrikan daude hirurak. JON URBE / ARGAZKI PRESS

Jon Eskudero -

2014ko ekainak 20 - Alegia

Batzuk joan, besteak etorri. Aldaketen testigu izaten ari da pilota mundua aspaldian, eta datorren astetik aurrera beste hiru pilotari berri ikusi ahal izango dira kantxetan: Jokin Altuna amezketarra, Julen Urruzola asteasuarra eta Iñaki Artola alegiarra. Tolosaldea eskualdekoak, hirurak ere. Afizionatu mailan txapel mordoa lortu ondotik, merezitako jauzia egingo dute, eta ilusioz gainezka ekingo diote bide berriari. «Luze samar egiten ari zaigu itxaronaldia, baina gogotsu gaude», esan du Altunak. Amezketarraren eta Artolaren kasuan, itxaropen handia dute jarria Aspek zein Asegarcek, aspalditik baitauzkate begiz jota. Ezberdina da Urruzolaren kasua. «Ez nuen pentsatu ere egingo halako aukerarik iritsiko zitzaidanik. Orain dela denbora gutxi oker agertzen zen prentsan nire abizena: Urrexola, Urrosola... Orain, berriz, goitik behera aldatu da egoera, eta oso pozik nago».

Hiruretan gazteena Altuna da, 18 urterekin. Txikitatik nabarmendu izan da, baina garai txarrak igarotakoa ere badela gogoratu du. «Indarrez eskas geratu nintzen 12 bat urte nituela, eta gaizki pasatzen nuen partidetan. Egurra ematen zidaten, eta negarrez itzultzen nintzen etxera». Gerora, baina, luzatu ederra hartu dio gorputzak. «Eta eskerrak! Indarra etorri ahala ondo jokatzen hasi nintzen. Orain ez naiz pilotari indartsua, baina bai ausarta». Ez da atzean geratzen den horietakoa. «Odol hotzekoa naiz. Aurkarien jokoa sarri aztertzen dut, burutsu jokatzea garrantzitsua baita. Erasoan jokatzeko aukera dudanean ez dut birritan pentsatzen».

Gaztea bai, baina Altuna baino bi urte zaharragoa da Artola. Hura ere gazte-gaztetatik nabarmendu izan da. «Gainerakoak baino indartsuagoa izan naiz beti, eta erraz aritu izan naiz. Gehien, akaso, aurrean jokatzen kostatu izan zait». Hain zuzen ere, arrazoi hori medio buruari buelta bat baino gehiago eman izan dizkio. «Jendeak beti esaten zidan aurrean tantoa amaitzen ez nekiela, eta presioa sarri jasan izan dut. Itsutu ere egin nintzen horrekin, eta, une batean, atzera jotzen ere ahaztu egin zitzaidan». Hori bai, orain pilotari osoa da. «Aurreko koadroetan abilezia hartu dut, eta kolpe handikoa naiz». Altunak eta Artolak elkarren aurka jokatuko dute lau t'erdian, San Fermin ferian.

Urruzola, pilota uztear

Debuta egingo duen hirugarrena Urruzola da. Ziurrenik, ustekabekorik handiena. 23 urte ditu asteasuarrak, eta ez zuen asko espero Aspek halako aukerarik emango zionik. «Pilotan gustura ari nintzen azken bi urteetan, baina sinistu ezinik geratu nintzen kontratua sinatzeko esan zidatenean». Gaur egun, ez da ohikoa 23 urterekin profesionaletarako jauzia ematea, baina ongi merezitako saria izango du Urruzolak, hainbat txapelketa garrantzitsu irabazi baititu denbora gutxian: Euskadiko Txapelketa, GRAVNI, Biharko Izarrak... «Barriolaren antzeko ezaugarriak dituen pilotaria naiz, kolpeagatik baino gehiago segurtasunagatik nabarmentzen dena».

Dena den, gozamenera heltzeko sufrikario ugari igaro behar izan du asteasuarrak bere kirol ibilbidean. Izan ere, pilota uzteko zorian egon zen orain dela bizpahiru urte. «Eskuetako minaren ondorioz, kalbario ugari izan nuen, eta pilota uztea pentsatu nuen. Momentu horretan asko lagundu zidaten ingurukoek eta gurasoek, eta haiei esker nago nagoen lekuan». Orain pena bakarra du barruan: «Debuta egin ahal izatea izugarria da, baina herri arteko txapelketa utzi behar izan dut, eta pena pixka bat ematen dit horrek».

Erik Jaka eta Xabi Tolosaren debuten ostean, Tolosaldeak beste hiru pilotari gazte izango ditu aurrerantzean profesional mailan. «Ausartzen naiz esatera gure eskualdea Euskal Herriko pilotazaleena dela. Orain arte hori kantxetan islatu ez izana harritzekoa zen. Egoera kanbiatzen ari da», esan du Artolak. Debutatu bai, baina hurrengo pausoa puntara heltzea dute. «Oraindik ere nafarrak ditugu nagusi goi mailan». Hiru gazteak indartsu datoz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nacho Monreal jokalaria, 2021eko irudi batean. ©Javier Etxezarreta, EFE

Nacho Monrealek futbola utziko du

Uxue Rey Gorraiz

«Garai bat bukatu da. Beste bat hasi. Zoriontsu naiz», azaldu du futbolari nafarrak sare sozialetan zabaldutako mezu batean. Hamasei urte egin ditu futbol profesionalean; Osasunan eta Realean horietako hainbat.

 ©NADETH AGIRRE

«Gure arraun egiteko erari eustea izan da arrakastaren gakoa»

Julen Etxeberria

Oriok hirugarrenez irabazi du Euskotren liga, baita Nadeth Agirrek ere. Baina gehiago nahi dute. «Zarautzen irabazi nahi dugu, lana biribiltzeko. Gero, Kontxan nagusitu nahi dugu».
Yuri Berchiche, etsita, aukera bat huts egin ondoren. Athleticeko ezker hegaleko atzelariak zutoinera bota zuen baloia. ©MONIKA DEL VALLE / FOKU

Grina ez da nahikoa

Haritz Gallastegi

Athletic Mallorca baino gehiago izan da San Mamesen, baina azken metroetan dituen zailtasunek sari barik utzi dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Jon Eskudero

Informazio osagarria

Iruzkinak kargatzen...