Bitan banatzen da Bilboko Done Jakue plaza Aste Nagusiko eguerdietan: itzalpean eta eguzkitan daudenen artean. Gogor jotzen zuen eguzkiak atzo, eta, horregatik, aulkiak hartu, eta jende gehiena itzalpean jarri zen. Ordu batez bertatik ez mugitzeko asmoa zeukaten, egunero izaten diren bertso saioetako bat entzutera bildu baitziren. Horregatik, agian, hala agurtu zuen Unai Iturriagak bertaratu zen jendea: «Eskerrik asko eta ondo etorri / gerizpetako jendea». Amets Arzallus izan zuen atzo bertsotako lagun, eta hark ere Done Jakue plazako itxurari egin zion erreferentzia: «Gure patua beti izan da / itzaletik ibiltzea». Librean aritu ziren kantuan atzo, ordubetez isildu gabe. Bertsotan aritzeko gustuko modalitatea bientzat, saioan onartu zutenez.
Eguraldia izan zuten kantugai bertsolariek behin eta berriro. Baina ikusle denak ez zeuden itzalpean, eta eguzkitan zeudenei egin zien aipamena Iturriagak:
Eguzkia ei dana
zeruetako juez
gaur ere agintari dau
beste askotan lez
sektore nagusiak
egin deutzo ihes
batzuk erdi-erdian
astroaren parez
Cambrilseko oporrak
aurreztu dabiez
Ez ziren hor amaitu ikusleei egin zizkieten erreferentziak. Agertokiak sortzen duen itzala aprobetxatuz, egunero jartzen baita bertsozale talde bat lehen lerroan. Eurei egin zien erreferentzia Arzallusek: «Baina zerbait heldu da / nere begietara / ikusi al duzu Unai / jarri so plazara / zona VIPean dagon / lehenengo ilara?». Horrela heldu zion amuari Iturriagak:
Ilara bat badago
ez dira hiru-lau
aulkiak hartu eta
aurrerantza ri-rau
urterokoak dira
urteroko arau
benetan zer doguzen
horrek kezkatzen nau
masokista edo VIP,
zer da ilara hau?
Hau erantzun zion Arzallusek:
Nik ezin zirikatu
arren, arren, arren
sei zortzi bazaudete
hor hurrenez hurren
bertsoa gertutikan
begiratzearren
pentsa ze zale leial,
fin eta nabarmen
tabladua baino lehen
omen zeuden hemen
Done Jakue plazan zeuden biak kantuan, izen bereko elizaren ondoan. Ile motz eta sandaliekin igo zen taulara Iturriaga, eta itxura horri heldu zion Arzallusek: «Pentsatzen nago praile sartzea / pentsatzen ari al zeran». Izatekotan, erromes izango zela erantzun zion bueltan durangarrak: «Baina erromes izan gura dot / Bilbon egingo det froga / ea egun baten heldu ahal dodan / Algaratik Barullora». Eta berriz ere fedearekin bueltaka hasi ziren bi bertsolariak. Letek azken urteak elizan pasatu zituela eta Joxanton Artze ere antzera dabilela gogoratuz, Arzallusek Iturriagari esan zion: «Fededun izan ezean / ezin zara poeta izan». Emandako tituluari kasu handirik egin gabe erantzun zion bueltan Iturriagak: «Federa buelta egitekotan / Aita Santu edo ezer ez».
Fedearekin eta sinismenekin aurrera eta atzera eskaini zituzten hainbat bertso, harik eta Arzallusek hurrengo gairako abiapuntua bota zuen arte: «Jainkoa ez dakit / non aurkitzen den / ez da nere esparrua / bai, baina Munillaren hitzetan / ikusten dut deabrua». Doinua aldatu zuen orduan Iturriagak, eta Donostiako apezpikuaren azken adierazpen polemikoak hartu zituen hurrengo gairako abiapuntu. Honela bota zuen:
Ez dakit zeren bila dabilen
han zeru goiari kantuz
ni behintzat ez nau konbentzituko
erretorika hori hartuz
baina hor dabil ona ta txarra
zer dogun guk seinalatuz
ta bide batez gertatzen diren
bortxaketak justifikatuz
Bide beretik heldu zen hendaiarraren bertsoa:
Zoritxarrean azken aldian
zenbat karraxi eta ulu
eta Munillak altare hortan
dena doktrin ta urgullu
ta gertatzen denaren aurrean
pentsa genukela dolu
begiak ixten dituen gisan
ahoa itxiko balu
Bide hori hartu zuen saioak, eta, nahitaez, Aste Nagusian gertatutako sexu erasoak ekarri zituen Iturriagak: «Non deukie batzuek burua / ta zertan dabil jendea / hobe lepora lotuz gero / euren birilidadea». Arzallusek, bere aldetik, hedabideen jardunari begiratu zion hurrengo bertsoan: «Gorputza objetu bihurtzea / drama ikaragarria / nahiz hedabideek ere salatzen duten / hain gertakizun larria / beldur naiz kontrako eskola bat / ez dagon martxan jarria». Geroago, gizontasuna ulertzeko eta harremanak bizitzeko beste modu bat aldarrikatu zuen: «Garaia da korapiloen hari denak askatzeko / bakoitzak badu bere barruan / lan handi bat pentsatzeko / ta batez ere gaur egunean harremanak ulertzeko».
Aurrera zihoan bertso saioa, eta, libreko ariketarekin gertatu ohi den bezala, bertsolariek ez zekiten noiz amaitu behar zuten. Ordubeteko saioa izango zela bai, baina denbora kontrolatzerik ez. Arzallusek hala egin zuen kexa: «Hemendik erlojua / ezin da ikusi». Iturriagak eman zion erantzuna: «Ba gorputz luze hori / mugitu gizona / lehengo lekuan dago / elizako horma / laurden gutxirantza dago / orratza igona / baina ez dakit sinistu / elizak diona». Puntutako saio, eta agurrekin amaitu zuten saioa, erlojuak esandakoa sinistuta ala ez.
Itzalekoei kantuka
Done Jakue plaza egunero betetzen da bertso saioekin gozatzeko. Eguzkiak gogotik jo eta bero egin arren, itzalpetik ere gozatu ahal izan da Unai Iturriaga eta Amets Arzallusen emanaldia.
Iruzkinak
Ez dago iruzkinik
Ordenatu