Ereindakoa jaso

Bere gustuko lanean ari den profesional arrakastatsu bati (kirolari, artista, mediku, kazetari...) galdetzen zaionean txikitan zerk markatu zuen bere karreraren hasiera, laino guztien gainetik ibiltzen da arrakastatsuon irudimena, eta balizko hastapen eder batzuen berri ematen zaigu, zer erein hura jaso esaera balioetsiz.

Askotan, ordea, errealitatea gordinagoa izaten da. Lang Lang piano-jole txinarrak dio hiru urte zituela jarri zutela pianoa jotzen, baina gogaikarriak omen zitzaizkion pianoa, irakaslea, gurasoen seta. Behin, ordea, Tom eta Jerry marrazki bizidunak ikusten ari zela, Liszt-en Tragedia hungariarra jotzen hasi omen zen Tom, Jerryk sekulakoak eta bi egiten zituen bitartean musika-saioa izorratzeko. Lang Langek dio Jerryri lehia irabazteko saioa dela bere karreraren helburua.

Agian horregatik dago hainbeste sukaldari ospetsu Donostian: sukaldeko beroan gozatu nahiko dute umetako danborradetan pasatutako hotza.