Aberri.- Nongotasunaren bertsio gorena, abstraktua; abstrakzio guztiak bezala, oinarritzat hartzen duen errealitatearen datuekiko lotura ausazkoduna.
Aberri Eguna.- Abertzale guztiek, epel zein suhar, beren burua independentistatzat aldarrikatzen duten urteko egun bakarra; patuaren zoritxar bategatik beti igandea izaten denez (jaieguna), adostasun horrek ekarri beharreko ondorioak indarrik gabe iristen dira astelehenera.
Abertzale.- Ikus ez-abertzale.
Abizen.- Jendea sailkatzeko sistema arkaiko eta akastuna, harrotasunez bete ohi gaituena; besteak beste, ezagutu ez dugun etxe, egin nahi ez genukeen ogibide edo familiako inork oinordetzan jaso ez duen ezaugarri batean oinarritua.
Abstrakzio.- Azalduta ikusita baino ederragoa den (arte)lana.
Absurdo.- Norberaren iritzien kontrako adierazpena, A. Biercek definitu legez. Zutabe hau ez hedatzeko eragozpen eta lotsa guztiak.
Aburukide.- Bere burua nabarmendu eta ondokoak probokatu nahian ez dabilen pertsona arrazoizkoa. Haiekin ibiltzeari utziz gero, zeure burua nabarmendu edo ondokoa probokatu nahian hasteko arriskuan jar zaitezke.
Ahalegin.- Porroterako bide neketsuena.
Aste Santua.- Jesu Kristoren amaitze santua ospatzeko lau jaieguneko astea.
JIRA
Piztegia
Iruzkinak
Ez dago iruzkinik
Ordenatu