Londresek du diru zorroa

Erresuma Batuko Gobernuak aurrekontu bat ezarri dio Ipar Irlandari, alderdiak ez direlako ados paratu gobernua osatzeko. Londresek negoziatzen jarraitzeko eskatu du
Ipar Irlandako Parlamentuaren egoitza, Stormonten (Belfast). Martxoaren 2an egin ziren legebiltzarkideak aukeratzeko azken hauteskundeak.
Ipar Irlandako Parlamentuaren egoitza, Stormonten (Belfast). Martxoaren 2an egin ziren legebiltzarkideak aukeratzeko azken hauteskundeak. PAUL MCERLANE / EFE

Mikel Rodriguez

2017ko azaroak 15
Zortzi hilabete baino gehiago igaro dira Ipar Irlandan hauteskundeak egin zituztenetik, eta ez dute oraindik gobernua osatu. Bi alderdi nagusiek, DUP unionistak eta Sinn Fein errepublikanoak, oraindik desadostasun sakonak dituzte zenbait gaitan, eta Londresek autonomiari eragiten dion neurri irmoa hartu du: aurrekontu bat ezarri dio menpean duen Irlandako zatiari. Lorden Ganberak —Erresuma Batuko goi ganberak— atzo jaso zuen Londresko gobernuak egindako proposamena, behe ganberak —Komunenak— herenegun onartu ondoren. Theresa May Erresuma Batuko lehen ministroak ukatu egin du aurrekontua ezarrita autonomia kendu dutenik. DUP pozik agertu da neurriarekin, eta lorpentzat saldu du. Sinn Feinek, ordea, unionistei eta Londresi leporatu die akordiorik ez lortzearen erantzukizuna, eta krisia gainditzeko Erresuma Batuko Gobernuari eta Irlandako Errepublikakoari eskatu die konferentzia bat antolatzeko.

Krisia urtarrilean piztu zen, Martin McGuinnes lehen ministrorde errepublikanoak dimisioa eman zuenean, Arlene Foster lehen ministro unionistari eragiten zion ordainketa irregularren auzi baten ondorioz. Batasuneko gobernua hautsi zenez, martxora aitzinatu zituzten hauteskundeak, baina ordutik ez dira ados paratu. James Brokenshire Erresuma Batuaren Ipar Irlandarako idazkariaren arabera, beharrak bultzatuta ezarri dute 2017-2018ko urte politikorako aurrekontua, erakunde autonomoen funtzionamendua bermatu ahal izateko. «Ez luke traba bat izan behar negoziazioek jarraitzeko. Orain arteko akordio faltak ondorio nabarmenak izan ditu Ipar Irlandako herriarentzat eta zerbitzu publikoentzat», argudiatu zuen Brokenshirek herenegun, Komunen Ganberako eztabaidan.

Westminsterreko alderdi guztiak ados zeudenez, bozkatu gabe onartu zuten aurrekontua. Ian Paisley DUPen ordezkariak aurrekontua baino zerbait gehiago egiteko eskatu zion Brokenshireri. «Erantzukizun politikoa hartu behar da, eta lehenbailehen izendatu behar dira ministroak, kontrol politikoa hartzeko».

DUPen eta 'tory'-en ituna

Nigel Dodds DUPen bozeramailea, berriz, pozik agertu zen aurrekontuarekin. «Ipar Irlandako herri guztiak, unionistek, nazionalistek... guztiek ongi hartuko dute osasun sistemari, hezkuntzari eta zerbitzuei emandako diru hau, DUPek gobernuarekin egin duen akordioari esker», adierazi zuen. DUPek ekainean egin zuen akordioa Alderdi Kontserbadorearekin, May lehen ministro izendatu eta unionisten botoekin tory-en gehiengoa segurtatzeko. Sinn Feinen ustez, unionistek Londresen lortu duten ahalmen hori traba bat ari da izaten Irlandako negoziazioetan. «Britainiako Gobernua konplize izan da, DUPek konpromisoei egin dien ukoa babestu duelako», salatu zuen herenegun Michelle O'Neil Sinn Feinen Ipar Irlandako arduradunak.

Brokenshirek ahalmena du negoziazioei bertze epe bat paratzeko. Irlandako hedabideetan Eguberria aipatu dute hurrengo epetzat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna