Derbi bat, bi aldarte

Alaves eta Athletic aurrez aurre izango dira gaur Mendizorrotzan, sasoiko azken derbian. Oso egoera ezberdinean iritsiko dira
Ander Iturraspe eta Alfonso Pedraza, lehian, lehen itzulian San Mamesen jokatutako partidan.
Ander Iturraspe eta Alfonso Pedraza, lehian, lehen itzulian San Mamesen jokatutako partidan. MONIKA DEL VALLE / FOKU

Eñaut Agirrebengoa -

2018ko maiatzak 12
Lehen begi kolpean, nahiko urardotua dirudi gaur Alavesek eta Athleticek jokatuko duten lehiak. Izan ere, bi taldeek jada ezer gutxi dute jokoan. Arabarrek arazorik gabe eutsi diote mailari, eta bizkaitarrak ez gora ez behera gelditu dira. Nolanahi ere, ondo begiratuz gero, badago Mendizorrotzan jokatuko den partida erakargarri egiten duen aldagairik. Batetik, gaurkoa denboraldiko azken derbia izango da —11 jokatu dira orain arte—. Bestetik, postu eta puntu bakarraren aldea dago sailkapenean bi taldeen artean: hamahirugarren dago Alaves, 44 punturekin, eta hamalaugarren Athletic, 43 punturekin.

Eta, horretaz landa, aldarteen derbia ere izango da, kontrako umorez baitira batzuk eta besteak. Alavesek bekoki alaia du, eta ez da gutxiagorako. Sasoi hasiera beltza osatu ondotik, dinamika irauli, eta erraz eutsi dio mailari. Susperraldia Abelardo Fernandezek gidatu du aulkitik, eta asteazkenean beste urtebeterako berritu zuen. Manu Garcia kapitainak ere berritu zuen, 2020ra arte. Athleticek, ordea, aurpegi zurbila du. Taldeak ez du esperotako maila eman, eta klubak herenegun jakinarazi zuen datorren sasoian Jose Angel Ziganda Kuko-k ez duela jarraituko zuri-gorrien aulkian.

Gaurkoa izango da sasoi honetan Mendizorrotzan jokatuko den azken lehia, eta Alavesek azken hilabeteetako jardunari ginga jarri nahiko dio bere zaleen aurrean. Min hartuta daude Ruven Duarte, Carlos Vigaray eta Antonio Sivera. Teknikari espainiarrak ez du uste bizkaitarrengan eraginik izango duenik jakiteak Zigandak ez duela segituko. «Partida modu profesionalean prestatuko du, aurreko 36ak bezala, eta jokalariak prest egongo dira».

Egun osoan, omenaldia egingo zaio 1997-98ko sasoian Lehen Mailara igo zen taldeari. Derbia festa giroan emango dute, beraz, gasteiztarrek.

Duin amaitu nahian

Ospakizunetarako motiborik ez du, ordea, Athleticek. Goiko postuei begira ekin zion sasoiari, azken lau urteetan Europan lehiatu ondotik. Alabaina, Zigandak ez du asmatu taldeari zukua ateratzen, eta jokalariek ere beren maila onenetik urrun jardun dute. Ahazteko moduko denboraldia izan da zuri-gorrientzat, baina, bederen, duin bukatu nahi dute. Azken partidan 2-0 irabazi zioten Betisi, hiru defentsako sistemarekin. Gaur Zigandak apustuari euts diezaioke. «Ondo bukatu nahiko nuke, eta hori joko onarekin dago lotuta», adierazi zuen atzo.

Oscar de Marcos Iñigo Lekueren ordez ariko da, eta aurrean Iñaki Williamsek, Iker Munianek eta Aritz Adurizek jokatuko dute berriro.

ALAVES-ATHLETIC

Alaves. Pacheco; Martin, Maripan, Ely, Dieguez; Pina, Manu Garcia; Ibai, Munir, Sobrino; eta Demirovic.

Athletic. Kepa; Unai Nuñez, Yeray, Iñigo Martinez; De Marcos, Beñat, Mikel Rico, Saborit; Williams, Aduriz eta Muniain.

Epailea. Estrada Fernandez.

Lekua. Mendizorrotza (19.810 ikusle).

Ordua. 18:30ean (Gol).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna