Albistea entzun

Israelgo lanak, lehen planora

Ikus-entzunezko Saioen Nazioarteko FIPA jaialdiak tarte berezi bat eskainiko dio Israelgo produkzioari urtarrilaren 23tik 28ra, Miarritzen. Jaialdiaren 31. edizioa da aurtengoa
Moran Iferganen <em>Hakir</em> dokumentaletik hartu irudia; Jerusalemgo Deitoreen harresian, emazteen aldean.
Moran Iferganen Hakir dokumentaletik hartu irudia; Jerusalemgo Deitoreen harresian, emazteen aldean. MORAN IFERGAN Tamaina handiagoan ikusi

Nora Arbelbide Lete -

2018ko urtarrilak 16

Orotara, 30 bat herrialdetatik etorri 120 bat film dituzte biltzekoak Miarritzeko Ikus-Entzunezko Saioen Nazioarteko FIPA jaialdian, urtarrilaren 23tik 28ra. 31. aldia du beteko jaialdiak. Usaian baino film gutxiago dituzte hautatuak. François Sauvagnargues FIPAko ordezkari nagusiak azaldu du horrek film bakoitza bi aldiz proiektatzeko aukera emanen diela.

Hori bai, FIPAk bere betiko xedeekin segitzen du; hau da, «kalitatezko lanak» aurkeztea. Sorkariak ezagutarazi, erosteko edo saltzeko aukera eman, aztertu eta zenbait bide irekiz. Dela lehiatik kanpo ala barne. Lehiak zazpi ataletan banatuak dituzte: fikzioak, serieak, nazioarteko dokumentalak, Frantziako dokumentalak, gazteen sorkuntzak, musika eta ikusgarriak, eta publikoaren saria. Ekitaldi bereziek ere osatzen dute jaialdia. Haietako bat Jean-Xavier de Lestraden The Staircase dokumental seriaren proiektzioa osoa da. Hamahiru oren, bi egunez. Oinarri, Kathleen Petersonen heriotza. Hilik aurkitu zuen, 2001ean, Michael Peterson senarrak, Kaliforniako Durhamen (AEB). Bizi osoko presondegira kondenatu zuten, baina azkenean libratu. 2004an hasi zuen lanaren lehen partea de Lestradek. Azken partea, berriz, orain bururatu du, eta FIPAn estreinatuko du.

ISRAEL

Ahal gutxirekin zenbat egin daitekeen frogatzeko balio dutela Israelgo ikus-entzunezko lanek: horra herrialde horren gonbidapenaren zergatietako bat, Sauvagnarguesek azaldurik. Hasteko, prestaketa eskolen kopurua bera da azpimarratzekoa. Goi mailako hogei ikus entzunezko eskola daude, zortzi milioi biztanleentzat: «Hori izugarria da». Bertako ikus-entzunezkoaren beste indar gisa tokiko serie batzuk Ameriketako Estatu Batuetako mugak gainditu izana dauka Sauvagnarguesek.

Eduki aldetik ere bada zer ikasi, ordezkari nagusiaren irudiko: «Bere testuinguru geopolitikotik abantaila ateratzeko gaitasun handia dute autoreek». Baita serietan ere, justuki. Fauda izan daiteke bat. Bigarren sasoiko lehen atala emanen dute gaur zortzi egitekoa duten irekitze jaialdian, 19:30ean, Midi geltokian. «Bukaerarik gabeko gatazkak serie honen protagonistak xehatuko ote ditu noizbait?»: galdera horrekin aurkezten dute Lior Raz eta Avi Issacharoffen serie arrakastatsua jaialdiko liburuxkan.

Lehiaketetan badaude hango lanak, baina bereziki lehiaketatik kanpo dituzte aurkeztuko. Leku berezia izanen dute FIPA Industry egitasmoan. Sektorearen aldaketak aurreikusteko anbizioarekin sortua du egitasmoa jaialdiak. Profesionalei zuzendua da bereziki. Bertan, Israelgo produkzioa biziki presente izanen da. Adibide bat emateko, Dror Moreh dokumental egileak eskola magistral bat emanen du. Moreh ezagun egin da The Gatekeepers dokumentalagatik; FIPAn aurkeztu zuten, 2013an. Shin Bet-eko sei buru ohi elkarrizketatu dituzte lanean. Israelgo barne defentsarako informazio agentzia da Shin Bet. Taburik gabe mintzo dira, gordin, beren huts egiteez eta baita azken 30 urteotako politikez ere.

BASAHAIDEAK

Euskal Herriko filmik ez da aurkitzen usaian jaialdi honetan. Baina, aldi honetan, Elsa Oliarj-Inesen Les aires sauvages (Basahaideak) dokumentala dago lehian publikoaren sariaren atalean. Egileak anaia duen Oihan Oliarj-Inesek osatu Oihaneko zühainetan diskoaren grabaketa prozesua du oinarri. Niko Etxart, Maika eta Mixel Etxekopar eta Jean-Mixel Bedaxagar kantari musikariak ditu hor elkartzen, euskal kantu herrikoiak kantatzen. «Zerk osatzen dituen tradizio baten oinarriak?» galderari erantzuteko saiakera bat da lana. Oihan Oliarj-Ines da protagonistetako bat, eta, hark bere burua ez zuenez aski segur ikusten beti euskaraz mintzatzeko, hor agertzen dira zenbait elkarrizketa frantsesez. Horiek ez dute euskarazko azpidatzirik izanen FIPAko emanaldietan. Asteartean 10:00etan proiektatuko dute, Kasinoan, eta ostegunean 12:00etan.

EMAZTEAK, HERENA

Saioen herenen zuzendariak emazteak direla ere nabarmendu dute antolatzaileak, eta zehaztu lehen aldiz direla hainbeste. Weinsteinen jazarpenen salaketekin hasi jazarpenen aurkako mugimenduaren haritik, gai horrek nolabaiteko tarte bat izanen duela gaineratu du Sauvagnarguesek. Urrezko FIPArako lehiatuko diren fikzioen sailean, Parole contre parole Didier Bivelenen lanak eta Stefan Krohmer-en Meine Fremde Freundin fikzioak bortxaketaren gaia dute muina.

BIRTUALA LEHIAKETARA

Errealitate aregotua erabili den sorkari zenbaitzuek lehiaketetan parte hartuko dute, lehen aldiz, ohiko ikus-entzunezko saioen ondoan. Haietako bat Karim Ben Khelifa zuzendariaren The Enemy da. Frantziako dokumentalen saileko urrezko FIPArako lehian sartu dute.

Kazetari zelarik, «eragiteko», urteak pilatzen hastearekin argazkiak egitea ez zela gehiago aski ohartu, eta beste zerbait egiteko nahian abiatu zuen proiektua Ben Khelifak. The Enemy-k 360 graduko irudietan murgiltzeko aukera ematen du, kasko integrala buru gainean. Hori janzten duen ikusleak munduko gatazka erreal batzuk bizi izan dituzten soldadu erreal batzuk ezagutuko ditu. Ben Khelifak egin elkarrizketak dira. Baina, hor, soldaduen gorputza bera sentitzeko aukera eman nahian pentsatu irudiak daude. «Esperientzia» ahal bezainbat pertsonifikatzeko asmoz, erakustaldia aitzin, ikusleak galdera batzuei erantzun behar die, «gatazkei begira duen harreman emozionala zehazteko». Algoritmoek ibilbide bat marraztuko diote. Etsaia ez dela hain ezberdina erakustea du xede autoreak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©JON URBE / @FOKU

Bekatarien boteretzea

Itziar Ugarte IRizar

Dom Campistronek 'Bekatorosak' liburu grafikoa ondu du, Aldude inguruko lesbiana, gay eta bisexualen zazpi testigantzatan oinarrituta
1 ©MONIKA DEL VALLE / @FOKU

Denboraren kondentsazioak

Amaia Igartua Aristondo

Remigio Mendibururen hiru hamarkadako lana bildu du Bilboko Arte Ederren Museoak 'Mendiburu. Materia eta memoria' erakusketan. Eskulturaren esanahiaz dihardu. Irailaren 5era arte dago ikusgai
Saltxitxa batzuen barrutik igaroko da erakusketako bisitaria. Barruko hormetako azukre kotoiek Glauze eta Kreonte irudikatzen dituzte. ©MARISOL RAMIREZ / FOKU

Medearen ekintzak, enpatiaz

Amaia Igartua Aristondo

Antoni Hervasen 'Sausages' erakusketak Euripidesen 'Medea' tragedian pertsonaia mitologiko horrek duen bilakaera islatzen du. Okela sormen lantegian ikus daiteke, ostiralera bitarte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna