Nuri Bilge Ceylanen lanak harrera ona izan du

Nuri Bilge Ceylan zinemagile turkiarra Cannesko zinema jaialdiko sari nagusia eskuratzeko hautagai nagusien artean dago atzo Winter Sleep aurkeztu eta gero, Anton Txekhoven hainbat narraziotan oinarritutako amodio istorio bat kontatzen duen filma. Hiru ordu eta laurdeneko filma da, erritmo motelekoa, baina xehetasun handiz landua. Ceylanek adierazi du arriskuak hartu dituela filmean elkarrizketa literarioak txertatzean. «Hori ohikoa da antzerkian, baina ez zinemagintzan», adierazi zuen atzo, filma aurkeztean.

Sail Ofizialeko lehian izango da Damian Szifron zuzendari argentinarraren Relatos salvajes ere, atzoko estreinaldian ikusleen barrea eragin zuen komedia. Aktoreen artean Ricardo Darin eta Leonardo Sbaraglia ditu.