Euskal folklorearen zainetatik eta bertako tradizio musikaletik abiatuta, hiru izen ezagun bilduko dira gaur Lesakan: Stephane Garin, Xabier Erkizia eta Gaizka Sarasola. Musikaren eskutik, hainbat bidezidorretan topo egin dute hiru artista hauek; oraingoan, Nafarroan.
Soinu ehiztari nekaezinak dira hirurak; musikaren mugak hautsi dituzte soinura iristeko. Horren adibide da Erkizia eta Garinek osatutako Euskal Herriko Soinu-mapa; belarriak ongi ireki, eta Euskal Herriko txokoak entzunez ezagutzeko plataforma.
Sarasola ere Erkiziarekin lanean ibilia da, eta horren fruitu dira elkarrekin egindako bi disko: Ez naiz deusen jabe (2007) eta Ixuriak (2004). Lan horiek soinu aldetik esperimentaziorako proposamena dira, eta inguruneko doinu eta giroen gaineko hausnarketa egiten dute.
Gaurko emanaldia Lesakako Keinu Leihoak 2011 egitasmoaren barnean kokatzen da. Antzerkia da, clown estiloa hain zuzen, ekimen honetako ildo nagusia, baina ez bakarra. Asier Gogorza argazkilari beratarrak Concrete landscapes izeneko erakusketa dauka ikusgai. Bertan porlanezko paisaiak sortzen ditu, pin hole teknikaren bitartez.
Soinua eta artea bere egingo ditu, beraz, Lesakako Karmeliten Komentuak.
STEPHANE GARIN, XABIER ERKIZIA ETA GAIZKA SARASOLA
Non. Lesakako komentuan.
Noiz. Gaur, 18:00etan.
Hiru musikari, soinu lanetan
Stephane Garin, Xabier Erkizia eta Gaizka Sarasola musikariek kontzertua emango dute gaur Lesakan
Iruzkinak
Ez dago iruzkinik
Ordenatu
