Lapurdiko talde berritzaileak

Islaia eta Sfumato rock taldeek kontzertua emango dute gaur Miarritzeko Atabal aretoan
Sfumato taldeak hilabete honetan kaleratuko du lehen diskoa.
Sfumato taldeak hilabete honetan kaleratuko du lehen diskoa. BERRIA

Ainhoa Arano -

2012ko apirilak 6
Islaia eta Sfumato Ipar Euskal Herriko talde gazteek kontzertua emango dute gaur Miarritzeko (Lapurdi) Atabal aretoko kafetegian, gaueko bederatzietan hasita. Islaia Hazparneko (Lapurdi) taldeak rock atmosferikoa eta doinu elektronikoak nahasten ditu. Lehen lana aurten kaleratu dute, eta post-rock kutsua duen musika intimista jasotzen du. Iparraldeko taldearen esperimentazio grinaren emaitza da diskoa. Peio Irigoien —gitarra—, Beñadin Lohiague —ahotsa eta gitarra—, Imanol Zubieta —baxua— eta Laurent Martinek —sanpleak— osatzen dute talde euskalduna.

Sfumato, berriz, Baionako taldea da. 2003an jaio zen, Manejo del dolor eta El arte taldeak desegitean. 90eko hamarkadako noise musikatik edan, eta rock kementsua egiten dute. Bateria, baxua eta gitarra bakarrik erabiliz, zuzenekoan emozioz beteriko kantu indartsuak eskaintzen dituzte. Tabernaz taberna kontzertuak ematen ibili dira hasieratik, abestiak inprobisatuz, baina hilabete honetan hirukoteak ekoitzitako Transition lehen albuma kaleratuko da. Ustaritzeko (Lapurdi) Tribal estudioan grabatu zituzten abestiak. PortoBello Bones, Sleepers, Tool, Deftones, Virago, Mogwai, Blonde Redhead, Portishead edota From Monument to Masses taldeen bideari jarraitzen diote. Sarrera doakoa da.

ISLAIA ETA SFUMATO

Noiz. Gaur, 21:00etan.

Non. Miarritzeko Atabal aretoan (Lapurdi).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna