Mondragon Unibertsitatean irakasle da Jon Sarasua Maritxalar (Aretxabaleta, Gipuzkoa, 1966). Euskaltasunaren norabidea. Nondik jo? hitzaldia emango du gaur, Egiako kultur etxean (Donostia).
Hiztunpolisa saiakera plazaratu zuen Sarasuak urrian. «Zer egin?». Galdera hori egiten dio Sarasuak bere buruari liburuan. Euskarak hartu duen norabideari hainbat aldetatik begiratu dio horretan. Euskalgintza «lausoaldi eta ahulaldi batean» dagoela uste du irakasleak. Hainbat alorretan orain arte eginikoari «astindu bat» eman behar zaiola.
Azken boladan «aro berria» esamoldea eskuin-ezker aipatzen dute, baina, Sarasuaren arabera, ez da ziurra aro berri horrek «blokeo mental batzuk aldatzeko adina arnasa» ekarriko duen.
Ezker eta eskuin abertzalearen arteko lehiatik harago, euskarazko gizarte erakundeen sareak «diskurtso beregain bat, doinu propio bat eta estrategia autonomo bat» landu beharko lituzkeela uste du. Halere, argi uzten du euskarak ez duela despolitizatzea baizik eta «berpolitizazio moduko bat, bestelako oinarri batzuetan». Sarasuak dioenez, hamabost urte berandu gabiltza «arlokako estrategiak bultzatu eta trinkotu, eta indar politikoen mahai gainean sinesgarritasunez jartzeko moduko planteamendu eta estrategietara iristeko orduan».
HITZALDIA
Noiz. Gaur, 19:00etan.
Non. Egiako kultur etxean, Donostian.
Zer egin euskalduntasunarekin
Jon Sarasua irakasleak hitzaldi bat emango du Donostian, atera berri duen 'Hiztunpolisa' liburuan oinarrituta
Iruzkinak
Ez dago iruzkinik
Ordenatu