Errautsen azken tantoak

Artedrama eta Le Petit Theatre de Pain taldeen 'Errautsak' lanak azken emanaldiak egingo ditu datozen egunetan

Errautsak antzezlaneko aktoreak, oholtza gainean. Gaur, Amurrion izango dira. NICOLAS MOLLO.
Erredakzioa
2011ko azaroaren 20a
00:00
Entzun
Publikoaren eta kritikaren oniritzia jaso eta Euskal Herriko hamaika antzokitan ibili ostean, Errautsak antzezlanaren azken emanaldiak egingo dituzte datozen egunetan Artedramak eta Le Petit Theatre de Painek. Gaur, Amurrion izango dira. Datorren astean, berriz, ostegunean Hondarribian, ostiralean Villabonan eta larunbatean Elgetan. Hain zuzen ere, Elgetakoa izango da azkeneko emanaldia.

«Bidean esperientzia biziki ederrak izan ditugu. Sariak ere jaso ditu antzezlanak: batetik, ikusleen Txalo saria Azpeitian, eta, bestetik, Donostia Saria. Baina benetako saria antzokiak beteta ikustea izan da», diote antzezlanaren egileek euren webgunean. Zazpi mila ikusle inguru joan dira ikustera. «Antzokiak, pilotalekuak eta gaztetxeak beteta ikustea benetan izan da bizigarria».

Errautsak egitasmoaren sorkuntza azken lau urteetan Artedrama eta Le Petit Theatre de Pain taldeek egin duten elkarlanaren emaitza da.

Istorioa Hodeiren heriotzarekin hasten da. Gaztaroko lagunak Hodeiren hiletarako bilduko dira. Saminak eta berriz elkartzearen emozioak eraginda, Hodeiren azken agurra garai bateko festa basati bihurtuko da. Iraganeko eta oraineko egiak, gezurrak eta kontraesanak azaleratuko dira.

'ERRAUTSAK' ANTZEZLANA

Noiz. Gaur, 19:30ean.

Non. Amurrioko antzokian (Araba).
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.