Esako etxeak desjabetzeko prozesua «legez kanpo» egiten ari direla salatu dute

Esa + Ez taldeak dio Ebroko Ur Konfederazioak ez duela erabaki horri buruzko txostenaren berri eman.

Manifestazioa eginen dute gaur
Esako eskuineko hegala; goian, desjabetuko dituzten etxeak.
Esako eskuineko hegala; goian, desjabetuko dituzten etxeak. J. MANTEROLA / ARP

Edurne Elizondo -

2015eko urtarrilak 2
«Ezin dugu onartu. Legez kanpo ari dira. Modu erabat antidemokratikoan». Esa + Ez Lanak Gelditu eta Rio Aragon elkarteek Ebroko Ur Konfederazioaren jarrera salatu, eta azaldu dute Esako (Nafarroa) Mirador eta Lasaitasuna urbanizazioetako 103 etxeak desjabetzeko prozesua «informazioa ezkutatuz» egiten ari direla.

Azaroaren 27an eman zen Espainiako Aldizkari Ofizialean etxe horiek desjabetzeko tramiteen berri. 50 milioi eurokoa da aurrekontua. Egin ahal izateko, Esako urtegia handitzeko proiektua moldatu behar izan du konfederazioak. Moldaketa horren arabera, etxeak desjabetuko dituzte «segurtasun arrazoiengatik», eskuineko hegala «segurtasun eremuan» sartzeko. Txosten teknikoa aipatzen da, erabaki hori azaltzeko. «Aipatu dute, eta, antza denez, txostena egon badago; ez dute jendaurrean aurkeztu, ordea», salatu dute Esa + Ez Lanak Gelditu eta Rio Aragon elkarteek. Informazioa ez zabaltzea eta «gardentasunik gabe» jokatzea egotzi diote ur konfederazioari.

Hori ez da arazo bakarra, gainera, Esa handitzeko lanen aurka lanean ari diren bi elkarteon hitzetan. «Eskuineko hegalak mugitzen jarraitzen du», erran dute. Bertzetik, etxeak desjabetzeko prozesuaren bidez proiektuaren aurrekontua «enegarrenez handitu» egin dela salatu dute. Hasierako aurrekontua 109 milioi eurokoa zen, eta 425 milioi euro baino gehiagokoa da jada, Esako etxeak desjabetzeko behar den kopurua kontuan hartuta.

Egoera hori agerian uzteko, manifestaziora deitu dituzte herritarrak, gaur, Zangozan (Nafarroa), 19:30ean. Karrika Nagusitik abiatuko da protesta. Antolatzaileek nabarmendu dute presatik behera dauden herriak husteko planik ez dela. Zangozako Udalari eskatu diote lan egin dezala egoera hori lehenbailehen konpontzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna