Sudmine enpresaren «maskarada» salatu dute Lapurdiko ekologistek

Lapurdi barnealdean urrea ustiatzeko baimena eskatua du Sudmine enpresak, baina Frantziako Gobernuak ez dio oraindik erantzunik eman. Mineralen ustiaketan diharduen enpresak urrats bat aitzinago joan nahi du, ordea, eta tokiko hautetsi eta eragileei gutun bat bidali die etzi batzartzeko gonbitarekin. Tokiko hitzartze eta jarraipen batzorde izena eman dio enpresak bilkurari, baina, urre meategia egiteko baimenik ez duenez, horrelakorik ezin du egin berez, ofizialki. Horixe salatu dute Lapurdiko StopminesEH eta CADE elkarte ekologistek: «Bilkura hori maskarada bat da». Elkarretaratzera deitu dute ostiralean berean, 18:00etan, Senpereko pilota plazan.

Joan den udazkenean hasi zen zabaltzen Sudmine enpresak Lapurdiko 11 herriren lurretan egin nahi duen meatze proiektua, eta ordutik adi daude talde ekologistak. CADEren bultzadaz sortu dute StopminesEH taldea ere, proiektuaren kontra egiteko. Bietako kidea da Martine Bouchet, eta, haren ustez, Frantziako Ekonomia Ministerioari normaltasun itxura emateko deitu du enpresak batzarra. Hain zuzen, ministerio hori da enpresari urrea ustiatzeko baimena eman diezaiokeena. Iraila baino lehen ez luke emanen baimena, Boucheten arabera.

Hitzarmen bat ere izenpearazi nahiko lieke enpresak tokiko eragileei, baina CADEkoaren ustez, horrek ez du zentzurik: «Meatze kode ahulak dauden lekuetan soilik egiten dira halakoak».

Gehienak ez dira joanen

Sudminek ostiraleko batzarrera deitutako anitzek errana dute jada ez direla agertuko. Horien artean dira Catherine Seguin suprefeta, Colette Capdevielle eta Sylvaine Alaux diputatuak eta Errobi herri elkargoko auzapez guziak.