Albistea entzun

Fujimoriren aroa «atzean uzteko» eskatu die Peruko presidenteak herritarrei

Kuczynskik esan du Fujimorik «huts larriak» egin bazituen ere, «jada» hamabi urtez egon dela preso. Presidente ohiak indultua eskertu du
Fujimoriren aurkako manifestariak eta Polizia, Liman.
Fujimoriren aurkako manifestariak eta Polizia, Liman. EDUARDO CAVERA / EFE Tamaina handiagoan ikusi

Erredakzioa -

2017ko abenduak 27

Pedro Pablo Kuczynski Peruko presidenteak telebistan emandako mezu batean defendatu du Alberto Fujimori presidente ohiaren indultua, baina ez du aipatu akordio politiko baten ondorio izan denik; horren ordez, berretsi du soilik «arrazoi humanitarioak» izan dituela oinarri. Gainera, herritarrei eskatu die Fujimoriren aroa «atzean uzteko», eta esan du «demokrata» sentitzen direnek ez luketela utzi behar Fujimori espetxean hiltzen. «Peruko presidente ohi baten osasunaz eta bizirik irauteko aukerei buruz ari gara. Gehiegikeria eta huts larriak egin bazituen ere, zigortu egin zuten, eta zigorraren hamabi urte beteak ditu». Fujimorik ospitaletik grabatutako bideo batean indultua eskertu du, eta barkamena eskatu die presidente zenean «huts» egin zien «beste herrikideei».

Presidente ohiak zaintza berezien unitatea utzi zuen atzo, Alejandro Aguinaga mediku eta kongresista ohi fujimorizaleak jakinarazi zuenez. Espetxetik eraman zuten ospitalera, baina Gabon gauetik aske dago. Kuczynskik erabat defendatu du hartutako erabakia, eta Fujimoriren agintaldiko krimenak erlatibizatu egin ditu. «Krisi bortitz eta kaotiko baten erdian hartu zuen herrialdea, baina uste dut haren gobernuak aurrerapen nazionalari ekarpena egin ziola». Kuczynskik adierazi du «agian» presidente denetik hartu duen «erabakirik zailena» izan dela.

Fujimorik 1990ean irabazi zituen hauteskundeak, eta 2000. urtera arte izan zen presidente, Perutik ihes egin zuen arte. 2005. urtean Txilen atxilotu zuten, eta Perura estraditatu. 2009an 25 urteko espetxe zigorra ezarri zioten gizateriaren aurkako krimenak egotzita —1991n eta 1992an armadako talde ezkutu batek egindako 25 hilketaren erantzuletzat jo zuten—, eta espetxe zigor txikiagoak ere badauzka ustelkeria delituengatik. Kenji Fujimori presidente ohiaren semeak esana du akordio bat egin zuela aitaren indultua lortzearen truke. Kongresuak duela bost egun bozketa bat egin zuen Kuczynski kargutik kendu ala ez erabakitzeko —Brasilgo Odebrecht eraikuntza enpresaren ustelkeria auzian nahasi dutelako—, baina Kenji Fujimorik eta beste bederatzi ordezkarik alderdiaren diziplina hautsi, eta Kuczynskik presidentetzan irautea ahalbidetu zuten.

Funtzionarioen dimisioak

Hainbat manifestazio egin dituzte indultuaren aurka. Herenegun gauean, Poliziak horietako bat desegin zuen Liman, Fujimoriren ospitalera hurbildu nahi zuelako. Justizia Ministerioko Giza Eskubideen Saileko hiru arduradunek dimisioa eman dute indultuarekin ados ez daudelako.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lurrikarek eragindako kalteei so.

5.000tik gora dira oraingoz Ekialde Hurbileko seismoetan hildakoak

Arantxa Elizegi Egilegor - Mikel O. Iribar

Gau osoan zehar lanean jarraitu dute erreskate taldeek, baina toki askotan laguntzaren zain daude oraindik. Ohartarazi dute biktima kopurua handitu egingo dela datozen orduetan. Milaka dira kaltetuak, eta 20.000tik gora zaurituak. Erdoganek hiru hilabeteko larrialdi egoera ezarri du hamar probintziatan.

«Herrialdearen historiako lurrikararik okerrena izan da hau»

«Herrialdearen historiako lurrikararik okerrena izan da hau»

Orsola Casagrande

Kurdistanen krisi mahaia eratu du HDP alderdiak, laguntza kudeatu eta kaltetutako eremuetara iristeko. Aterpeak lortzea da orain lehentasuna Sancarrentzat.

Greziako kostazainen ontzi bat, artxiboko irudi batean. ©HELLENIC COAST GUARD / EFE

Gutxienez hiru migratzaile hil eta hogeitik gora desagertu dira Lesbostik gertu

Mikel O. Iribar

Kostazainek hamasei pertsona erreskatatu dituzte. Bizirik atera direnen esanetan, haien ontzia haitzen aurka jo ostean hondoratu da.

Palestinar bat astelehenean Jeriko hirian izandako tiroketen arrastoei begira. ©EFE

Israelgo armadak adin txikiko palestinar bat hil du tiroz

Berria

Gazteak haien kontra tiro egin zuela adierazi dute armadaren iturriek. Urte hasieratik gutxienez 42 palestinar hil ditu Israelek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.