Noiz sortua: 2018-03-04 00:30:00

BIRA

Egunerokotasuna

Miren Amuriza -

2018ko martxoak 4
Gauza txikiak, egunerokoak, handitzat edukitzen ditugu askotan: kafe bat, ibilaldi bat, elkarrizketa pausatu bat. Beren txikitasunean, gutxi behar izaten dute, baina, ezegonkortzeko ere. Hilabeteak daroatzagu Kataluniara adi eta ikasturte hasieran zenbait gertaera historiko bizitzea zer izango ote zen irudikatzen ahalegintzen nintzen moduan (diada, erreferenduma, mobilizazioak, independentzia aldarrikapena...), bertakoen egunerokotasuna zelakoa izango ote den pentsatzen egoten naiz orain. Zer ote den asteak joan eta asteak etorri, tentsioa, inpotentzia, ziurgabetasuna kudeatu beharra; aldiro-aldiro informazio berria jasotzen, prozesatzen eta egoerarekiko posizionatzen aritu beharra.

Gurean ere badakigu zerbait tentsioaz, inpotentziaz, ziurgabetasunaz. Ordea, hemen, muturreko egoeretatik pasatu eta denboratxo batera hitz egin izan da errepresioaren ondorio emozionalez eta horrexegatik eman didate atentzioa Elisenda Pradell psikologoari irakurritakoek (urriaren lehenean polizia jazarri zitzaien herritarrak tratatzen dihardu): biolentziaren eraginez hitz egitea bezain garrantzitsua ei da, ahal den neurrian, eskakizun sozialek ia erabat galarazi dieten aisialdia, egunerokotasuna, berreskuratzea: elkarrizketa pausatuak, ibilaldiak, kafeak... Gauza txikiak handitzat hartzea ondo edo ondo izorratuta gauden seinale izaten baita.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna