Puntuala naiz baina etxetik irtetear nagoenean, hargatik ez bada honegatik, beti egiten dit ihes (bost minutuko atzerapentxoarekin bizi zaretenok ulertuko nauzue).
Atzo goizean, adibidez, 40 minutu nituen gosaldu eta janzteko: utzi nuen katilua arraskan eta non ikusten dudan, sukaldeko leihotik, pareko bizilaguna alfonbra astintzen: ostra! Eta nik garbigailua bart gauetik hutsitu barik... Arropak eskegitzen nabilela, mugikorra joka: kuadrillako baten eguna; Whatsapp taldean zorionak, amona baten GIFa, iji eta aja... Eta handik ordu laurdenera, logelara itzuli nintzenean, falta zela konturatu: kaka! Segituan hasi nintzen bila, armairuan, ohepean: non gorde zara? Ordea, haren arrastorik ez. Banoa komunera, atostean begiratzekotan, eta ispiluaren aurrean: ui, iletxo bat kokotsean! Kendu eta buelta sukaldera mahaipean, frigorifikoaren gainean, zartaginen tiraderan begiratzera: zartagin hau... garantian ote dago oraindik? Eta, hantxe, tiraderan burua sartuta nengoela, pisukideak atzetik: zeren bila zabiltza? Eta nik: denbora galdu dut! Eta berak: berriro? Eta nik: bai, mugikorrarekin despistatu naiz une batez eta auskalo non sartu den... Eta berak: ez zenuen leihoren bat zabalik edukiko, ez? Eta nik: joder, arropak eskegi ditudanean!
Leihotik eskapatu zitzaidalako, horrexegatik berandutu nintzen atzo. Ez puntuala ez naizelako.
BIRA
Puntuala
Iruzkinak
Ez dago iruzkinik
Ordenatu