Albistea entzun

Iparraldeko hedabideen bozetako elkarlana saritu du 'Argia'-k

'Zebrabidea'-k eta 'Idemtitateak' saioek, 'Aiaraldea'-k eta 'Entzun'-ek ere jaso dituzte sariak
2015eko Argia sariak jaso dituztenen talde argazkia, atzo, ekitaldiaren ondoren.
2015eko Argia sariak jaso dituztenen talde argazkia, atzo, ekitaldiaren ondoren. GORKA RUBIO / ARGAZKI PRESS

Hodei Iruretagoiena -

2015eko urtarrilak 31 - Usurbil

Elkarlana goraipatu dute aurten Argia sarietan. Hainbat hedabideren artekoa, sarean egindakoa. Lapurdiko, Nafarroa Behereko eta Zuberoako iazko herri bozetan euskal hedabideek egindako lanari eman diote Interneteko ataleko saria, eta gainerako protagonisten hitzetan ere nabaritu da balio horren garrantzia. Eskuz esku, jarraipen zabala egin zieten martxoko hauteskundeei Kazeta.eus atariak, Ipar Euskal Herriko Hitza-k, Euskal Irratiek, Herria aldizkariak eta Kanaldude telebistak. «Egun hartako gertaerak zuen maila berekoa», Argia-ko Onintza Iruretaren hitzetan: «Elkarlanak zenbat balio duen badakigu inguruetan bizi garenok. Ez genuen alferrik garatu auzolanaren kultura».

Ohi bezala, Usurbilen banatu zituzten Argia sariak, bazkalondoan. Mahai inguruko giroan ziren euskalgintzako, hedabideetako eta erakundeetako ordezkari ugari: BERRIAko zuzendari Martxelo Otamendi, Gara-ko Iñaki Soto, Jakin aldizkariko Lorea Agirre, Kontseiluko idazkari nagusi Paul Bilbao, Eusko Jaurlaritzako Kultura sailburu Cristina Uriarte, Gipuzkoako ahaldun nagusi Martin Garitano...

Argia-ko zuzendari Estitxu Eizagirreren hitzekin ekin zioten ekitaldiari, «balioaren eta baloreen» inguruko hausnarketarekin: «Guretzat, balio hitzak zerrendatutako balore esan nahi du». «Txanponen neurriari» bainoago, bestelakoei eman zien garrantzia: «Txanponetan neurtu izan bagenu beti gure amets bakoitza, hemen zaudeten proiektu asko ez ziren sekula martxan jarriko».

«Hartxintxar bat»

Aldizkaria bera jarri zuen Eizagirrek adibide gisa: «Argia hartxintxar bat da Daviden patrikan. Davidek aurrean du Goliat, bertako eta munduko oligarkia». Eta munduan oso urrun joan gabe aldarrikatu zuen prentsa askatasuna ere, Topatu-ko kazetari Iraitz Salegi aipatuta: «Jarraipen informatibo bat egiteagatik, kartzelara joateko arriskuan da».

Ttitto Betbeder eta Jose Luis Aizpuruk jaso zuten lehen oroigarria, Ipar Euskal Herriko bozetan elkarlanean aritutako hedabide guztien izenean. Gogoan izan zuten BERRIAko kazetari Aitor Renteria Txato zena, langintza hartan aritua. Haien atzetik etorri ziren Iñigo Martinez eta Xabier Sagardia, papereko saria jasotzera, urtekari bihurtutako Entzun aldizkariaren izenean. Zailtasunak zailtasun, musikaren inguruko urtekari espezializatua egiten jarraitzeko asmoa agertu zuten.

Txikien baturaren emaitza da Zebrabidea ere, Arrosa sareko irratien artean egindako saioa. Gai ugari jorratzen dituela nabarmendu zuten Argia-koek, eta «apustua» egin dutela arratsalderoko magazinarekin. Nekane Zinkunegik eta Jon Aranburuk jarri zieten aurpegia atzo uhinetako ahotsei, baina ez zituzten ahazteko izan noizbait saioaren parte izan diren guztiak.

Sustapen ekintzaren saria, berriz, iaz indar handiz hazitako mugimendu batentzat izan zen: Gure Esku Dagorentzat. 150.000 lagun erabakitzeko eskubidearen alde eskutik helduta jartzea lortu zuten iaz. «Sustapenetik gauzapenera» pasatzeko itxaropenez hartu zuten saria Ainhoa Mendibilek eta Angel Oiarbidek.

Ikus-entzunekoetan, Hamaika telebistako Idemtitateak saioa nabarmendu dute aurten, «emakumeak denon gaiez hizketan» jarri dituena, Ane Zabala eta Nagore Uriarteren esanetan.«Azkenaldian ikusi dugun telebista saio politiko interesgarriena da», esan zuten Argia-koek.

Batera aritzearen balioa goraipatuz jaso zuten merezimenduaren saria Aiaraldea Komunikazio Leihoko Gartzen Garaio eta Izar Mendigurenek. Arabako eskualde horretan zegoen hutsunea bete izana goraipatu zuten sari emaileek, eta jarraitzeko grinez erantzun sarituek: «Balio dezala euskara, putzu sakon eta ilun bat izateari utzita, kolore eta tresna askotako ortzadar bihur dadin».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Tupustarrietako batean, senideak eta ordezkari instituzionalak, gaur, Barakaldon. ©IREKIA

Kontzentrazio esparru nazietako 12 preso gogoratu dituzte Barakaldon

Mikel P. Ansa

Alazne eskolako ikasle talde batek egin du ikerketa lana eta proposamena, eta udalak eta Eusko Jaurlaritzak babestu dute. Hego Euskal Herriko 250 herritar baino gehiago eduki zituzten preso naziek, eta horietatik 113 gutxienez hil ziren.

Herritarrek larunbat eguerdian egindako mosaikoa. ©FOKU

Usansolo udalerri bilakatzearen aldeko mosaiko herrikoia egin dute hainbat bizilagunek

Iñaut Matauko Rada

40 urteko ibilbidearen ostean, azken urratsa falta zaio Usansolori (Bizkaia) udalerri bilakatzeko: Bizkaiko Batzar Nagusietako bozketa gainditzea. Desanexioaren aldeko hainbat ekitaldi egin dituzte gaur.

Aitziber Sarobe eta Ainara Kaltzakorta, atzo, Ekotopaketen lehen mahaietako batean. ©ARITZ LOIOLA / FOKU

Kolektiboki ekiteko dei ozena

Maite Asensio Lozano

Krisi ekosozialari nola erantzun aztertzeko, Ekotopaketak egiten ari dira asteburuan Portugaleten, 'Azken krisia, gure garaia' lelopean

Los Arcos zirkuituaren inaugurazio ekitaldia, 2010eko ekainean. ©IÑIGO URIZ / FOKU

Los Arcos kostatu zenaren %10ean saldu du Nafarroako Gobernuak

Joxerra Senar

Gobernuko arduradunak pozik agertu dira salmentarekin, urtero lau milioi euroko gastua baitzuen zirkuituak. Zazpi milioitan saldu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...