Albistea entzun

Zalantzak aldarrikatuz

Ada Colau Bartzelonako alkatearentzat, Kataluniako galdeketak «presaka» egin delako itxura du. Generalitateak «lasaitasuna» eskatu die funtzionarioei
Iazko Diadan, irailaren 11n, Bartzelonan dozenaka milaka lagun batu zituen ANCk eta Omnium Cultural erakundeek antolatutako mobilizazioak.
Iazko Diadan, irailaren 11n, Bartzelonan dozenaka milaka lagun batu zituen ANCk eta Omnium Cultural erakundeek antolatutako mobilizazioak. TONI ALBIR / EFE Tamaina handiagoan ikusi

Igor Susaeta -

2017ko uztailak 12

Bai Kataluniako galdeketa hauspotzen dutenek, eta bai horren aurka daudenek Ada Colau Bartzelonako alkatea kritikatu dute azken egunetan. Beraz, batzuek zein besteek leporatzen diotenari erantzuteko, eta erreferendumaz, are prozesuaz, duen iritzia plazaratzeko, mezu bat argitaratu zuen atzo, Facebookeko bere kontuan. Erreferendumari buruzko zalantzak dauzka Colauk, eta, gainera, horiek aldarrikatzen ditu, «bidezkoa baita dudak edukitzea». Iruditzen zaio, gainera, Kataluniako Gobernuak datorren urriaren 1erako deitutako galdeketa «presaka» egin delako «itxura» daukala. «Ez dut bat egiten 'edo orain edo inoiz ez'-arekin, horrela jendea engainatzen dela uste baitut».

Colauk, dena den, erreferendumari, «edo dena delakoari», lagunduko diola eta horretan parte hartuko duela jakinarazi zuen herenegun. Horren harira mintzatu zen Soraya Saenz de Santamaria Espainiako Gobernuko presidenteordea atzo Espainiako Kongresuan, eta, hura aipatu ez zuen arren, ohartarazpen bat egin zion Bartzelonako alkateari: «Erraztasunak ezin daitezke funtzionarioentzako zailtasun bilakatu». Izan ere, Espainiako Gobernuarentzat «ilegala» da erreferenduma, eta, haren arabera, hori antolatzen duen orok, funtzionarioek kasu, legezko ondorioei aurre egin beharko diete.

Neus Munte Kataluniako Gobernuko bozeramaileak, baina, «lasaitasuna» eskatu die funtzionarioei, eta berriro adierazi du Generalitateak horiek babestuko dituela. Gogoan izan zuen, era berean, Kataluniako tokian tokiko 993 erakundeetako 1.500 funtzionariei Madrilek bidalitako gutuna. Horretan eskatzen zaie ez dezatela galdeketaren antolakuntzan parte hartu. Munteren iritziz, «mehatxatzen» duena Espainiako Gobernua da. «Ez dira modu koherente eta heldu batean erantzuteko gai».

Erantzun duena Colau izan da. Uztailaren 2an, Kataluniako El Periodico egunkarian argitaratutako elkarrizketan, ondokoa adierazi zuen: «Zaila dirudi hain denbora gutxian erreferendum on baterako baldintzak egotea». Besteak beste, horregatik kritikatu dute batzuek zein besteek. «Junts Pel Sik eta CUPek demokraziaren kontrako aldean jartzeaz akusatu gaituzte azken egunetan, eta baita PSCk, Ciutatansek eta PPk; baina kontrako arrazoiengatik!», idatzi zuen, atzo, Facebooken. «Eztabaida zintzoa» aldarrikatzen duenez, pentsatzen du zilegi dela «planteamendu bitarikoak» ez onartzea. Gauza bat argi dauka Bartzelonako alkateak: «Urriaren 2an, 1ean edozer gertatuta ere, Katalunia elkarrekin aurrerarazi beharko dugu, bestela denok porrot egingo baitugu».

Eta planteamendu horretan, alboan dauka Pablo Iglesias. Atzo, Podemoseko buruak defendatu zuen Kataluniako instituzioek erreferenduma «baliabide guztiak erabilita» ahalbidetzea. Halere, ez zion galdeketa deitu, «mobilizazio politiko legitimoa» baizik; ez zaiola loteslea iruditzen, alegia. Joan den ostiralean adierazi zuen, dena den, katalana izango balitz ez lukeela galdeketan parte hartuko.

Hautetsontziak

Erreferendumerako hautetsontziak lizitatzeagatik Meritxell Borras Gobernazio kontseilariaren aurka kereila zabaldu zuen Kataluniako Fiskaltzak joan den ekainaren 13an, eta, atzo, Kataluniako Auzitegi Gorenak adierazi zuen kontseilaria ikertzen jarraituko duela. Munteren ustez, ikerketak ez du oinarri juridikorik. Generalitateak, duela bi aste, bertan behera utzi zuen hautetsontziak erosteko lehiaketa. Bozeramaileak nabarmendu du horiek «zuzenean» erosten hasi direla.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©RAUL BOGAJO / @FOKU

«Bake akordioek diotenarekin alderatuz, atzera egin da guztiz»

Igor Susaeta

El Salvadorko gerra zibila bukatu zuten itunek 30 urte beteko dituzte 2022ko urtarrilean. Cruzen ustez, «atzeraldi demokratiko bat» gertatzen ari da herrialdean. Nayib Bukele presidentea jo du horren erantzule nagusitzat.
Antony Blinken AEBetako Estatu idazkaria eta Sergei Lavrov Errusiako Atzerri ministroa, atzo, Stockholmen, Ukrainako krisia aztertzeko egin zuten bileran. ©EFE

Errusiak segurtasun itun bat proposatuko dio «laster» NATOri

Gorka Berasategi Otamendi

Lavrov eta Blinken Ukrainaz hitz egiteko bildu dira. Moskuk ohar egin du bere segurtasun kezkei entzungor egitearen arriskuez. Washingtonek eskatu dio diplomaziaren bidea hautatzeko
Angela Merkel eta Olaf Scholz, gaurko agerraldian. ©FILIP SINGER / EFE

Alemania, derrigorrezko txertaketa onartzeko bidean

Ander Perez Zala

Merkelek jakinarazi du nahitaezko txertaketa ezartzeaz bozkatuko dutela diputatuek; otsailean sartuko litzateke indarrean. Txertorik hartu ez dutenak ezingo dira sartu jatetxeetan, tabernetan eta dendetan.

Bi bidaiari Johannesburgoko OR Thambo nazioarteko aireportuan, herenegun. ©KIM LUDBROOK / EFE

Von der Leyen: «Derrigorrezko txertaketa aintzat hartu beharko luke EBk»

Ander Perez Zala

Europako Batzordeko presidentearen iritziz, estatu kideek «ikuspuntu komun bat» behar dute. OMEk dio egunotan izango duela informazioa omikron aldaeraz

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.