Hona MIGren 2018ko martxoko barometroaren emaitza nagusiak:
LANGABEZIA
0,3 puntu gutxiago
Urratsez urrats jaisten ari da langabezia Lapurdin, Nafarroa Beherean eta Zuberoan. 2017ko hirugarren hiruhilekoko datuak dira MIGek emandako azkenak, eta, horien arabera, biztanle aktiboen %8,5 daude lanik gabe «Baionako enplegu eremuan». Urtebete lehenago baino 0,3 puntu gutxiago da. Langabeziak 2013 hasieran eta 2015eko bigarren hiruhilekoan jo zuen goia, %9,2ra iritsi zenean. Oso motel jaitsi da orduz gero, eta oso urrun ditu oraindik krisi aurreko zenbakiak, %7 ingurukoak. Edonola ere, Ipar Euskal Herriko emaitzak hobeak dira Akitania Berrikoak (%9) eta Frantziakoak baino (%9,4).Baina langabeziaren jaitsieraren atzean egoera kezkagarri bat ezkutatzen da: sortutako enpleguaren zati bat kalitate txarrekoa da. Horrek azal dezake etengabe emendatzen ari dela lan bila dabiltzanen kopurua. Iazko maiatzean, 28.701 ari ziren lan bila Pole Emploi enplegu bulegoetan, eta jada 29.830 dira (+%3,9). Bilatzaileen artean daude batere lanik ez dutenak (A taldea), hilean 78 ordu baino gutxiago lan egiten dutenak (B taldea), eta lanaldi osoa izan eta enplegu hobe bat nahi dutenak (C taldea).
Beste datu kezkagarri bat da lan bila ari direnen %41,8 epe luzekoak direla, hots, urtebetetik gora daramatela enplegu baten atzetik. Adin batetik gorakoak dira haietako asko —bilatzaileen %23,9 dira dagoeneko—.
SARIAK
2.186 euro hilean
Soldatadunen kopurua ere hazi egin da. 84.000 ziren 2017ko hirugarren hiruhilekoan, 2016an baino %2,9 gehiago. Emendatzen ari da haien soldata ere: 2.186 euroko sari gordina dute, 2016an baino %1,6 gehiago. Erosteko ahalmen pixka bat berreskuratu dute, 2017aren amaieran urtebete lehenago baino %1,2 garestiago zeudelako salneurriak (Frantziako datua).Hurrengo hiruhilekoetan ere litekeena da langabezia jaistea, lau enpresatik batek langileak kontratatzeko asmoa daukalako (+%1,4). Udako sasoian etorriko dira kontratazio horietako asko, baina ez gehienak: %53,7 dira sasoiaren arabera sortzen ez diren lanpostuak.
ENPRESAK
Saldo positiboa
Azken urteetan bezala, 2017an ere gehiago dira sortu diren enpresak (2.801) desegin direnak baino (1.494). Gainera, kontrako norabidean doaz bi zenbatekoak: %4,4 gehiago sortu dira, eta %2,8 gutxiago desegin. Zerbitzuetan sortu dira enpresa berri gehien (%47,3), eta merkataritza alorrekoak ondoren (%25,8).Zailtasunak dituzten enpresak ere gutxitzen ari direla dio MIGek: iaz 236k zabaldu zuten prozedura kolektibo bat (-%4,1). Haietako %61 likidatu zituzten(-%5,3).
PERSPEKTIBAK
Konfiantza dute %77k
«Jarduera ekonomiaren indartzea baieztatu da», dio urte hasierako barometroak. MIGek galdezkatutako 400 enpresaburuen artean, %77k konfiantzaz ikusten dute etorkizuna, eta %7 baizik ez daude mesfidati. Negozio kopuruari eutsiko diotela uste dute %44k, eta beste %38k, berriz, handituko dutela. Hori hala da %83k baieztatu dutelako eskarien zorra ongi doakiela, eta %80k ez dutelako espero arazorik altxortegian. Gauzak horrela, %13k dute langile gehiago kontratatzeko asmoa, eta %3k baizik ez dute uste inor bota beharko dutenik.Arazoak ere ikusten dituzte Ipar Euskal Herriko enpresaburuek. Nagusia da irabazi tarteak oso txikiak direla, beren produktuen salmenta prezioek berriro behera egin dutelako.
