Noiz sortua: 2016-09-24 00:30:00

Muturra sartzeko aukera

Eibarrek eta Realak derbia jokatuko dute gaur eguerdian, Ipuruan. Berdinduta daude sailkapenean, zazpi punturekin, eta irabazten duena goian jar daiteke
David Zurutuza eta Gonzalo Escalante, lehian, Realak eta Eibarrek denboraldi-aurrean Bergaran Kilometroen alde jokatutako lagunarteko partidan.
David Zurutuza eta Gonzalo Escalante, lehian, Realak eta Eibarrek denboraldi-aurrean Bergaran Kilometroen alde jokatutako lagunarteko partidan. REALA

Aitor Manterola-Jon Eskudero -

2016ko irailak 24

Denboraldiko partida berezienetakoa hartuko du gaur Ipuruak: Eibar eta Realaren arteko derbia. Ligako seigarren jardunaldia da, eta Gipuzkoako bi taldeak zazpina punturekin daude berdinduta. Irabazlerik badu eguerdiko partidak, sailkapenaren goialdera igoko da balizko garailea, eta horrek ere ematen dio gatza eta piperra derbiari.

Hirugarren aldiz jokatuko dute elkarren aurka Eibarren, Lehen Mailan, eta datua eibartarren aldekoa da, aurreko bietan etxeko taldea nagusitu baitzen. Gaur egungo zenbakiak aztertuz, orain arteko bost partidetan, bina garaipen dituzte. Armaginek Valentzia eta Granada menderatu dituzte, eta txuri-urdinek, Osasuna eta Las Palmas; bi garaipenak dituzte berdin banatuak, bat etxean eta bestea etxetik kanpo lortu dituztelako.

Eibarrek jokalari guztiak dauzka jokatzeko moduan, eta Jose Luis Mendilibar bakarrik faltako zaio, entrenatzaileak zigorraren bigarren partida bete beharko baitu harmailan.

Aste honetan jokatuko duten hirugarren partida izango da, eta horretaz aritu zen atzo Mendilibar: «Realak guk baino aldaketa gutxiago egin zituen aste barruko partidan, eta guk, gainera, egun bat gehiago eduki dugu atseden hartzeko. Hala ere, ez da erabakigarria izango egoera hori». Iragarri zuen nolako partida aurreikusten duen: «Irekia izango da, eta biok izango ditugu aukerak irabazteko, irekita jokatzen dugulako bi taldeok».

Ez zion inolako garrantzirik eman aurreko bi denboraldietako emaitzari: «Iraganak ez du axola. Bihar [gaur] da partida, eta biharkoak bakarrik balio du. Reala saiatuko da kontrako estatistika hausten, eta gu eusten; ez dago besterik».

Reala, olatuari eustera

Realak, berriz, erregular izatea du helburu, behingoagatik bederen. Azken bi denboraldiotan horixe izan du bekatu nagusi: segidarik ez diola eman lan onari. Eta, joan den asteazkenean Las Palmasen aurka distira egin ondoren, bide berari eutsi nahiko dio Eusebio Sacristanen taldeak. «Aurkari bakoitzak ezaugarri ezberdinak ditu, eta, Las Palmasen aldean, beste zailtasun batzuk jarriko dizkigu Eibarrek. Halere, gu garena gara, eta horri eutsi behar diogu», adierazi zuen atzo entrenatzaileak. Haren arabera, konfiantza osoa dute euren buruarengan, eta prest daude lehiatzeko. «Jarrera bikaina izaten ari dira jokalariak lehen partidatik, eta jakina zen lehenago edo beranduago ongi jokatuko genuela. Orain, lanean segitu eta zelaian dena ematea geratzen zaigu».

Eusebiok hirugarren aldiz bisitatuko du Ipurua. Joan den sasoian Realaren aulkian eseri zen, baina lehenago ere izana zen. Besteak beste, Bartzelonaren bigarren taldea zuzentzen zuenean, Bigarren Mailan, Eibarren aurka neurtu baitzituen indarrak. Orduan goraipatu egin zuen talde armagina. Nabarmendu zuen indarra eta kemena inork baino gehiago zituela. Ordutik asko hazi da Eibar, baina, Eusebioren ustez, lehengo oinarri berarekin jarraitzen du. «Ipuruak badu zerbait berezi. Zaleen babesarekin, gora etortzen da taldea, eta sekulako intentsitatean jokatzen du. Horrez gain, taktikoki eta kalitate aldetik ere hobea da Eibar lehen baino. Erritmo hori berdindu egin beharko dugu punturen bat lortu nahi badugu».

Hasierako hamaikakoari dagokionez, aldaketak egin beharko ditu. Defentsako lerroko hegaleko bi jokalariak min hartuak ditu: Carlos Martinez eta Yuri. Giharretako arazoak dituzte biek. Beraz, Zalduak eta Hectorrek ordezkatuko dituzte. Gainerakoan ere baliteke aldaketak izatea, egun gutxian partida asko jokatzen ari direlako. Esaterako, baliteke Juanmik hasieratik jokatzea berriz ere, Xabio Prietoren kaltetan. Willian Jose erabat osatu da, eta hasieratik jokatuko du. Hiru gol daramatza bost partidatan.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Testak egiteko asmoz Ordizian atzo ipinitako karpa. ©JON URBE / FOKU

Ordizian egindako ehunka testen lehen 91 emaitzek negatibo eman dute

Arantxa Iraola

Zazpi positibori atxikita, ostatu gune batean ibilitako herritarrei testak egin dizkie Osakidetzak: 900 PCR proba egin dituzte, eta negatibo eman dute lehen 91k. Boluntarioa izan da parte hartzea. Ordizia, Beasain eta Lazkaoko eguneko zentroak itxi egin dituzte, eta zahar etxeetan bisitak kendu dizkiete zazpi egunez. Eskualdeko beste zahar etxeetan, halaber, kalera irteteko aukerarik gabe utzi dituzte bertan bizi diren adinekoak.

Ikasle bat, etsaminean, atzo. ©JON URBE / FOKU

«Dena izan da oso arraroa»

Arantxa Iraola

Hasi dute unibertsitaterako atea ireki diezaiekeen etsamina Arabako, Bizkaiko eta Gipuzkoako 12.594 ikaslek. Ohiz kanpokoa izan da bidea, eta ohiz kanpoko eran ari dira: maskara jantzirik dutela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna