Etxerat-ek bere gain hartuko du euskal presoen osasun eta lege laguntza

Bi arlo horiek senideei eragiten dizkieten gastuak pagatuko dituzte. «Jar litezkeen ekimen juridiko guztiak» jarriko dituzte abian, preso bakoitzaren egoeraren arabera
Urtzi Errazkin eta Patricia Velez Etxerat elkarteko bozeramaileak, Donostian eginiko prentsaurrekoan.
Urtzi Errazkin eta Patricia Velez Etxerat elkarteko bozeramaileak, Donostian eginiko prentsaurrekoan. JUAN CARLOS RUIZ / ARP

Iñaki Lasa Etura

2017ko urriak 25
Euskal presoen lege eta osasun laguntza bere gain hartuko du Etxerat-ek aurrerantzean. Laguntza ekonomikoa helaraziko die senideei, sortzen diren gastuei erantzunez eta beharrezko abokatuak bermatuta eta ordainduta. Aurrerapausoa emango du preso eta iheslarien senideen elkarteak, orain arte bete gabeko ardurei helduko baitie. «Espainiako eta Frantziako estatuek blokeoa mantentzen duten heinean, ziklo politiko berrian Etxerat elkarteak urrats bat aurrerantz egiteko erabakiaren berri ematen du». Atzo jakinarazi zuten erabakia Urtzi Errazkin eta Patricia Velez bozeramaileek, Senideei babesa indartzeko unea da lelopean eginiko prentsaurrekoan. Fernando Arburua Jaiki Hadiko sendagilea, Haizea Ziluaga abokatua, Gorka Garzia Etxerat-eko kidea eta hainbat senide izan zituzten alboan.

Bi eremutan jorratuko du lege laguntza, abokatuen bitartez. Batetik, euskal presoak espetxeetatik ateratzeko eta haiek etxeratzeko asmoarekin, beharrezko «ekimen juridiko guztiak» abiatuko dituzte; «preso bakoitzaren errealitatearen arabera». Bestalde, kartzelan daudenen bizi baldintzak hobetzeko lana egingo dute. Kasu bietan muturreraino iristeko prest agertu dira, beharrezkoa bada bide guztiak ibilita. «Badakigu kasu batzuetan Giza Eskubideen Europako Auzitegiraino jo beharko dugula».

Osasunari dagokionez, laguntza fisikoa eta psikologikoa eskainiko dute. Etxerat-eko bozeramaileek azaldu dutenez, euskal presoen kopuruak behera egin duen heinean —312 daude kolektiboaren barruan, gaur egun—, esponentzialki hazi da preso gaixoen kopurua: uneotan 91k dute nolabaiteko gaitzen bat. Horietako hamahiruk gaixotasun larriak dituzte, eta beste zortzik ez dute publiko egin nahi haien osasun egoera kaskarra. Espetxe zigor luzeak eta adina identifikatu ditu Etxerat-ek faktore gisa. Kartzelak osasun egoeraren gainbeherarekin harreman zuzena duela jakinarazi dute Errazkinek eta Velezek. «Espetxean urte gehiagoz egoteak ondorio kaltegarriak ditu osasun fisikoan eta mentalean, denbora honetan zehar egiaztatu ahal izan dugunez».

Etxerat Lagun izateko deia

Ardura berriek esfortzu ekonomiko handia eskatuko dute. Erronkari aurre egin ahal izateko eta sakabanatzeak eta urruntzeak eragindako premiak eta gastuak «arintzeko», laguntza eskatu diote euskal gizarteari. Etxerat Lagun bihurtuta egin daiteke ekarpena. Hilero edo puntualki lagun daiteke. Elkartearen webgunean eskura daiteke inprimakia: www.etxerat.eus .

Horrez gain, hainbat esparrutako eragileekin elkartuko direla baieztatu du Etxerat-ek: eragile poltikoak, sozialak eta sindikatuen mugimendukoak, langile eta enpresaburuak; kirol eta kultur alorrekoak, Eliza... «Planteatuko dieguna hau izango da: apustu erabakigarri honetan inplikatzea garrantzitsua dela, eta bakerantz eta gatazkaren ondorioen behin betiko ebazpenerantz urrats atzeraezin bat egiten laguntzea».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna