Albistea entzun

Katalunia. Euskal Herriko erreakzioak

Urkulluren bitartekaritza bitarteko

Jaurlaritzako lehendakariak bitartekari lanak egin ditu Puigdemontek bozak antola zitzan. Kataluniako hainbat enpresabururekin batzartu zen asteazkenean, irtenbide bila
Urkullu lehendakaria, atzo, kazetariz inguratuta, legebiltzarreko korridoreetan.
Urkullu lehendakaria, atzo, kazetariz inguratuta, legebiltzarreko korridoreetan. DAVID AGUILAR / EFE

Edurne Begiristain -

2017ko urriak 27

Carles Puigdemont Kataluniako Generalitateko presidenteak hauteskundeak antolatuko zituela zabaldu zen atzo eguerdian, eta, zurrumurru horiekin batera, hainbat hedabidek jakitera eman zuten erabaki horretan Iñigo Urkullu Jaurlaritzako lehendakariak ezinbesteko tokia izan zuela. Alegia, Urkulluk bitartekari lanak egin zituela Puigdemontek bozak antola zitzan PSCko hainbat buruzagiren bitartekaritza ere aipatu zuten.

El Periódico eta La Vanguardia egunkariek aurreratu zuten informazioa, eta hainbat albiste agentziak zabaldu zuten gero. Haien arabera, Urkulluk bitartekari lanak egin zituen Puigdemontek bozetara dei zezan eta Espainiako Gobernuak 155. artikulua ezar ez zezan. Arratsaldean, Generalitatearen jauregian egindako agerraldian, Puigdemontek aitortu egin zuen bozak antolatzea aztertu zuela, baina azkenean erabaki zuela bide hori ez zuela hartuko, «berme faltagatik».

Jakina da, nolanahi ere, Urkullu saiatu egin dela Espainiako Gobernuaren eta Kataluniako Generalitatearen arteko zubi lanak egiten, nahiz eta egindako ahaleginak ez duen oraingoz fruiturik eman. Asteazkenean Kataluniako hainbat enpresabururekin batzartu zen Urkullu Gasteizen; enpresaburu horiek «erakundeen eta gizarte zibilaren talde zabalago bat ordezkatuta» joan ziren batzarrera. Haien bitartez bidali zion Urkulluk mezua Puigdemonti, eskaera zehatza eginez: Mariano Rajoy Espainiako Gobernuko presidenteak 155. artikulua ez ezartzearen truke, independentzia aldarrikapena baztertu eta hauteskundeak antolatzea galdegin zion. Puigdemontek baiezkoa eman zion posta elektroniko bidez, iturri horien arabera.

Lehendakaritzatik ez da baieztapen ofizialik egon. «Oraingoz, ezin dugu ezer esan», besterik ez zuten adierazi atzo lehendakaritzako iturriek. Lehendakariak ere ez zuen adierazpenik egin. Eguerdian, hauteskundeen inguruko zurrumurruak indarra hartzen ari zirenean, bitartekaritzaz galdetu zioten kazetariek legebiltzarreko korridoreetan, eta irribarre batekin erantzun zien Urkulluk.

Bere burua eskaini du maiz

Urkulluk behin baino gehiagotan eskaini du bere burua Kataluniako auzian bitartekari lanak egiteko; bai urriaren 1eko erreferendumaren aurretik, bai gero. Urriaren 1a iritsi aurretik elkarrizketarako denbora bazegoela esan zuen, eta hainbatetan luzatu zien eskua bi aldeei: tentsio handieneko egunetan, hauteskunde kanpainan eta Estatuko Fiskaltzak Generalitatearen aurkako neurriak hartu zituenean.

Hilaren 2an, Katalunian erreferenduma egin eta biharamunean, Bilbon egin zuen hitzaldian, Urkulluk garrantzia kendu zion bitartekari gisa egin zezakeen lanari, eta esan zuen bera bezala «jende asko» aritu dela zeregin horretan lagundu nahian. Hala ere, ordurako —baita ordutik ere indarra hartua zuten Espainiako Gobernuaren eta Kataluniako Generalitatearen artean bitartekaritza lanaren beharra nabarmentzen zuten ahotsek. Erreferenduma egin eta egun batzuk geroago, legebiltzarreko saioan, berriro eskaini zuen bere burua bitartekari lanak egiteko. «Nire aldetik, behintzat, ez naiz eserita geratuko trenen talka gertatu eta bidetik irten bitartean».

Nazioarteko agintariekin ere zubi lanak egiten saiatu da lehendakaria. Urkullu bera eskutitz bidez jarri zen harremanetan Jean Claude Juncker Europako Batzordeko presidentearekin, eta bere burua eskaini zion Europaren eta Kataluniaren artean bitartekaritza lana egiteko eta aferari soluzioa emateko.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Senpereko herrriko etxeko oposizioak ere dimititu egin du

Senpereko herrriko etxeko oposizioak ere dimititu egin du

Arantxa Iraola

Urrian hautetsi hainbatek utzi zuten kargua, auzapezaren kudeaketa ereduarekin kritiko

Beatriz Artolazabal eta Ramiro Gonzalez, gaur, Gasteizen ©L. Rico / Efe

Gasteizerako proiektu «kontinuista eta berritzailea» gidatuko duela esan du Artolazabalek

Edurne Begiristain

EAJren Arabako Lurralde Batzarrak Arabako hiru barrutietarako hautagaiak berretsi ditu gaur. EH Bilduk oniritzia eman die Arabako zortzi udalerrietako zerrendaburuei, eta Ahal Dugu-k hiriburuetako hautagaiak aurkeztu ditu.

 ©MARISCAL / EFE

«EAJk 40 urtez egin duen politikan dabil EH Bildu orain»

Xabier Martin

Kupoaren bost urterako akordioa da EAJren legegintzaldiko mugarri nagusietako bat, Sagastizabalen arabera. Nafarroako trafiko eskuduntzari ongietorria egin dio.
Maria Txibite Nafarroako lehendakaria. ©VILLAR LOPEZ / EFE

Foru Hobekuntza: osatu edo berritu

Jon O. Urain

Txibitek uste du ez dela garaia Nafarroako Foru Hobekuntza moldatzeko, hura «garatzeko» baizik. Barkosek dio legea «bete gabe» dagoela eta «itun politiko berri bat» beharrezkoa dela

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.