Beste begirada bat euskararen aurrerabideari

Gogoetarako agiri bat egin dute euskararen arloko hamar lagun ezagunek, orain arteko bideaz eta aurrera begirakoez.

Adostasuna eskatu dute alderdien eta eragileen artean
JON URBE / ARGAZKI PRESS

Garikoitz Goikoetxea -

2015eko urriak 21
Gero eta diagnosi zabalduagoa da euskararen aurrerabideari dagokionez: «Geldialdi zantzuak nabarmenak dira». Ziklo bat bukatzen ari dela, beste fase bat hastera doala, eta etorkizuneko estrategiak ez daudela argi. Gogoetari ekiteko garaia dela gero eta leku gehiagotan entzuten da. Eztabaidarako dokumentu bat aurkeztu dute euskararen arloko hamar lagun ezagunek, Euskaltzaleen Topagunearen altzoan, Topalabea taldean; Berrikasi eta berrikusi agiria ondu dute. Azken hamarkadetako ibilbidearen azterketa kritikoa egin dute, «etorkizuna begi berriz ikusteko helburuarekin». Ardatza zein beharko lukeen maiz diote agirian: lankidetza.

Maiatzean argitaratutako dokumentua da Berrikasi eta berrikusi. Azken asteetan ari dira zabaltzen; atzo bertan, adibidez, solasaldi bat antolatu zuten Iruñean agiriari buruz hitz egiteko: Iñaki Martinez de Luna soziolinguistak jardun zuen hizlari —dokumentua taxutu dutenetako bat da—, Aitor Etxartek elkarrizketaturik.

Eztabaida sortzeko asmoa du agiriak: «Eztabaida zintzoa suspertu nahi luke egin dugunaz, eskarmentu horrekin hobeto ekin diezaiogun egiteko dugunari». Errepasoa egin diote azken hamarkadetako bideari, eta hutsuneak bistan jarri dituzte. Ardatza, hala ere, aldarria da, eskaria, elkarlanean aritzeko deia: «Sinetsita gaude asko komeni zaiola euskararen komunitateari esparru komunak sendotzea eta zabaltzea, beharrezkoa dugula euskaltzaleok barneratzea lotzen gaituena garrantzitsuagoa dela eta soilik denon arteko lankidetzarekin lor lezakeela euskarak bere iraganari dagokion etorkizuna».

Euskaltzaindiaren parekoa

Adierazpenaren funtsa horixe da batez ere. Ohartarazi dute zatiketa dagoela. Talde politikoei dagokienez, frankismoaren amaieran «arrakala» sortu zela azaldu dute, eta horrek eragina daukala oraindik; ez dute izen zehatzik aipatu, baina bistan da EAJren eta ezker abertzalearen arteko lehiari buruz ari direla. Uste dute haien arteko «hegemonia» lehiak mendean hartu duela euskararen gaia. Euskara hortik ateratzeko eskatu dute: «Arnasgune politikoa». Begiratu diete euskalgintzako eragileei ere: uste dute zailtasunak dituztela koordinatuta aritzeko. Instituzioek eta eragileek «erabakigune partekatuak» behar dituztela nabarmendu dute, eta formula gisa Euskaltzaindia jarri dute adibide: corpusaren arloan hark egiten duenaren parekoa estatusean egingo lukeen erakunde bat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Garikoitz Goikoetxea

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna