Martxoak 8: greba feminista

Ipar Euskal Herria. Grebak aukera ekarri du feministak elkartzeko

Grebalari Feministen Asanbleak prestatu ditu mobilizazioak. Berritasuna izan da: belaunaldi desberdinak elkartu dira, eta elkarlanerako abaguneak zabaldu ditu
Mobilizazioetara bildutako emakumeak, atzo eguerdian, Baionan, elkarrekin.
Mobilizazioetara bildutako emakumeak, atzo eguerdian, Baionan, elkarrekin. BOB EDME

Eneko Etxegarai Urain -

2018ko martxoak 9
Grebalari Feministen Asanbleak antolatu du greba Lapurdin, Nafarroa Beherean eta Zuberoan, eta biziki ontzat jo du emaitza. «Ipar Euskal Herri guzitik hurbildu da jendea, eta hori baikorra da», adierazi du Jenofa Berhokoirigoin asanbleako kideak. Adin desberdineko jendea bildu zen atzoko mobilizazioetan. Bernat Etxepare lizeoko ikasleen parte hartzea nabarmendu du Berhokoirigoinek: «Bada nahi bat eta behar bat feminismotik eraikitzeko gure egunerokoa, eta horren isla da gaurko jende zama polita». Lehen iritsi gabeko lekuetara heldu dira, Maite Zelestino kidearen erranetan. Horri heldu dio Berhokoirigoinek: «Bihar zer emango duen ikusiko dugu, baina bada gogo bat hau ez dadin horretan geldi».

Agerikoa da greba feministaren segipena askoz apalagoa izan zela Ipar Euskal Herrian. Euskal hedabideetan, Seaskako ikastoletan eta AEKn segitu zuten batez ere. Horretaz kontziente dira Grebalari Feministen Asanblean: «Egia da euskal esparruan dela aktibatu gehienbat, eta horren emaitza izan da». Hala ere, greba antolatzen elkarrekin aritu dira euskaldunak eta erdaldunak, Berhokoirigoinen arabera: «Aniztasun bat sentitu da alde horretatik».

Ibilbide horren balantze ona egin du Zelestinok: «Ikusirik hilabeteko lanketa izan dela, izan da jendea. Segur ez dela Hegoaldean adinako emaitza, baina han aspalditik landu dute gaia, eta beste zerbait da». Haren ustez, hilabete baino gehiagoko lanketa egin izan balute, beste esparru batzuetako jendea atxiki zen grebari. Ohartarazi du beste deialdi bat ere bazela Frantzian —15:40tik aurrera deitu zuten lanuztera—, eta horrek izan duela eragina.

Taldeetatik haratago

Asanblean 25 emakume aritu dira. Talde feministen arteko talkak saihesteko balio izan du asanbleak, eta norbanakoek parte hartzea ekarri du. «Ni ez naiz inolako talde feministaren parte, eta norbanako gisa etorri ahal izateak aukera eman dit aktiboki parte hartzeko», azaldu du Zelestinok. Berhokoirigoinek ere bai: «Ni ere ez naiz gehiago talde feminista zehatz batean, baina bai feminista, eta badut gogoa segitzeko».

Indarra ekarri die prestaketa lanak, Berhokoirigoinen erranetan: «Elementu interesgarriena da jendea grebaren gisako tresna erradikal baten inguruan batu izana; indarra eman dit». Armelle Etxenike asanbleako kideak nabarmendu du du feminismoa lantzeko beharra jarri dela agerian, eta «gehiago sentiarazteko» balio izan duela.

Greba prestatzeko osatu sarean jarri dute lehentasuna asanbleako kideek. Grebarako helburua beterik, Ipar Euskal Herriko mugimendu feministarentzat egun garrantzitsua izan zen atzokoa.