Hiru urtean %20 txikitu nahi du Jaurlaritzak azukre eta gatz kontsumoa

Araba, Bizkai eta Gipuzkoako herritarren jateko ohiturak hobetzeko programa bat abiatu du. Barazki eta fruta kontsumoa handitu nahi du
Besteak beste, eskoletako menuetan barazki gehiago egotea nahi dute.
Besteak beste, eskoletako menuetan barazki gehiago egotea nahi dute. J. C. / EFE

Ibai Maruri Bilbao -

2017ko urriak 31
Eritasun kronikoen %95 inguru elikadura ohiturekin eta ariketa fisiko faltarekin lotuta daude. Minbizi, diabetes, hipertentsio, bihotzeko gaixotasun iskemiko eta obesitate kasuen % 30ean ere garrantzitsua da zer jaten den eta zer jaten ez den. Horregatik, Eusko Jaurlaritzako Osasun Sailak proiektu bat ipini du martxan, herritarren elikadura ohiturak aldatzeko asmoz. Euskadiko elikadura osasungarrirako ekimenak du izena, eta atzo aurkeztu zuen Jon Darpon Osasun sailburuak.

Besteak beste, gatz eta azukre kontsumoa %20 txikitu nahi dute datozen hiru urteetan. Eta barazki eta fruta kontsumoa handitzea ere badu helburu; bereziki, gazteenen artean. Izan ere, ume eta nerabeen %51k ez dute egunero fruta jaten, eta %82k ez dute barazkirik jaten.

Osasun Saila da proiektuaren buru eta koordinatzaile. Harekin batera parte hartuko dute Eusko Jaurlaritzako beste sail batzuek —bereziki Ekonomiaren Garapeneko eta Azpiegituretako Saila eta Hezkuntza Saila—, eta hainbat sektoretako 50etik gora profesional, enpresa eta erakundek. Eragile guztiek nolabaiteko eragina dute herritarren jateko moduan. Proiektuak bost jardute lerro eta hamazortzi egitasmo zehatz ditu.

Lantoki eta eskoletan

Besteak beste, elikadura industriaren atxikimendua lortu gura du Osasun Sailak. Adibidez, sei hilabete barru jatekoa banatzen duten makinek elikagai osasungarriak ere saltzea lortu nahi dute. Ostalaritzara bideratutako lan ildo bat sortuko dute; eta lantokietan zer, noiz eta nola jaten den hobetzeko, enpresentzako orientazio programa bat ere bai.

Baina, batez ere, gazteek eragiten diete kezka. Horregatik, eskola jangeletan ere eragin nahi dute. Sare publikoan 90.000 umek bazkaltzen dute egunero. Hezkuntza Saileko Administrazio eta Zerbitzu sailburuorde Olatz Garamendik iragarri du jangelen kudeaketa adjudikatzeko baldintzetan aldaketak egingo dituztela, ikasleei ematen zaien jatekoa «osasuntsuagoa» izan dadin. Darponek zehaztu du dagoeneko menuetan obesitatea gutxitzeko neurriak hartu direla. Beraz, aurrerantzean fruta eta barazki kontsumoa handitzeko aldaketak egin nahi dituzte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna