Baionako bestak

Festetara sartzeko, sarrera ordaindu beharko dute baionarrak ez direnek

Ostiraleko 11:00etatik asteleheneko 02:00ak arte, zazpi eta zortzi euro arteko sarrera izango da
Jean Rene Etxegarai auzapeza prentsaurrekoa egiten, atzo, Baionako Herriko Etxean.
Jean Rene Etxegarai auzapeza prentsaurrekoa egiten, atzo, Baionako Herriko Etxean. ISABELLE MIQUELESTORENA

Eneko Etxegarai Urain -

2018ko maiatzak 16
Uztailaren 25etik 29ra iraganen diren Baionako festetara sartzeko, sarrera ordaindu beharko da. Hala jakinarazi du Jean Rene Etxegarai Lapurdiko hiriburuko alkateak. Neurriak ostiraleko 11:00etatik asteleheneko 02:00etara iraungo du, eta, alkateak zehaztu duenez, «oraindik ez da finkatua, baina zazpi edo zortzi euroko prezioa izango du sarrerak». Baionarrak ez direnek ordaindu beharko dute, «haurrek izan ezik; zehaztekoa da, baina pentsatzen dugu 14 urtetik goiti ordainaraziko dugula». Baionarrek eskumuturreko bat lortu beharko dute gunera sartzeko. «Inolako duda gabe izenpetzen dut herriko etxearen erabaki hau», azaldu du Etxegaraik. Erabakia festen aldeko «zinezko jarrera eta ekintza militantea» dela adierazi du Yves Ugalde hautetsiak.

Ugaldek azaldu du «Frantziako hiri handi batzuekin ere eztabaidatu» dutela egitasmoa: «Brive-la-Gaillarde eta Mont-de-Marsanen argi dute: ordainarazi. Orain ikusten ari dira nola». Herritarrek guztia ordaintzen dutela kritikatu diote festen antolaketari. Antolaketaren kostu orokorra 2,1 milioi euro da, eta baionarren kontura izaten dira 1,2 milioi euro. «Hori oso bortitza da hiriko aurrekontuarentzat. Zenbakiak begiratzean, iaz egin dugun kontaketaren arabera, bost egunez 850.000 eta milioi bat pertsona artean heldu dira festara. Alta, baionarrak 50.000 gara bakarrik». Urtez urte kostuaren emendatzearen adibideak jarri dituzte hautetsiek, Bisautak hurrena: «Hasieran, parking guziak irekiak ziren, baina kanpotik zetorren jendea hasia zen bertan festa egiten; orduan, pixkanaka, ospitale guztiak, egoitzak eta abar hasi ginen hesitzen, eta horrek kostu ikaragarria du».

Segurtasun handiagoa

Etxegaraik nabarmendu du sarrera ordainarazteko erabakia hertsiki lotua dela azken urteetan ugaritzen ari diren segurtasun neurriekin. «Ez da arinkeriaz harturiko erabaki bat; festen biziraupenaz ari gara, eta festazaleen segurtasunaz». Azken bi urteetan, segurtasun neurri gehiagorako, 400.000 euro handitu da faktura. «Badakigu zein den panorama, zein diren arriskuak, Nizako erasoa gogoan dugu; ezin dugu halakorik permititu», azaldu du hiriko agintari nagusiak. «Abokatua izanik ere, ez dakit zer heinetaraino naizen arduraduna; legean ez da argi, baina ni naiz arduradun penala, eta ez dut halako gertakaririk hartuko nire gain», azaldu du, zorrotz, Etxegaraik.

Millet Christian Barbier hautetsiak nabarmendu du sarrera ordainarazteaz gain «kontrolguneak» ere jarriko dituztela. «Honek guziak kostua du», esan du alkateak. Oraindik ez dute zehaztu non eta nola jarriko dituzten kontrolguneak, ez eta hirirako sarrerak non izango diren ere, baina Millet Barbierrek adierazi du aldaketa nabarmena izango dela: «Sarbide bakoitzean 30 pertsona inguruko talde bat izanen da segurtasun lanetan: langile pribatuak eta poliziak eskuz esku. Zakuak miatu ahalko dituzte, gainera. Hori lehen ezinezko egiten zitzaigun; segurtasuna bermatzeko aldaketa garrantzitsua da».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Eneko Etxegarai Urain

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna