Urteko lehen hiruhilekoan enpleguaren sorkuntza bizkortu da Nafarroan

Bizkortu egin da Nafarroako ekonomiaren hazkundea urtearen hasieran. Jakina zen barne produktu gordina %3,3 hazi zela urte arteko tasan —%3,2 aurrekoan—, eta atzo beste datu interesgarri bat zabaldu zuen NafarroakoEstatistika Institutuak: enpleguaren sorkuntza —lanaldi osoko enpleguetan zenbatuta— %2,8tik %2,9ra bizkortu dela urte arteko tasan.

2018ko lehen hiruhilekoan zerbitzuak izan dira Nafarroako ekonomiaren motorra. %4,4 hazi dira, aurreko hiruhilekoan baino hamarren bat gehiago. Zerbitzuen artean, merkatuko zerbitzuak dira indartsuenak (%4,4). Are gehiago bizkortu da eraikuntza, %1,8tik %2,2ra. Etxebizitza gehiago eraikitzen hasteak biziberritu du sektore hori, herri lanetan ez baita hazkunderik.

Motelago doa industria, hazkunde erritmoa %1,6tik %1,8ra igo arren. Baina tasa txikiago horren azpian udaz geroztik Nafarroako industriaren datuak kaskartzen dituen faktore bat dago: VWen modelo berria. Landabengo fabrikak erritmoa bizitu ahala ari da bizkortzen lurralde osoko industriaren datua, haren oso menpekoa baita. Bestela, ongi doa industria, Gizarte Segurantzaren afiliazio datuek erakusten dutenez.

Eskariari dagokionez, kontsumo pribatuak tasa handietan jarraitzen du, baina moteltzen ari da nabarmen (%3,6tik %3,3ra jaitsi da bi hiruhilekotan), eta suspertu, berriz, inbertsioa: %0,4tik %1,5era (bi hiruhilekotan ere bai). Atal horretan, eraikuntzan egiten den inbertsioa da indartsuena (%1,8), ekipamendu ondasunetakoa baino handiagoa (%1,3).