Fernando Perez Gomez izango da Bilboko Azkuna zentroko zuzendari berria

Nafarroako Gobernuko Kultura zuzendari nagusia da 2015eko abuztutik. Lourdes Fernandezen lekukoa hartuko du maiatzaren 1etik aurrera
Fernando Perez Gomez, artxiboko irudi batean.
Fernando Perez Gomez, artxiboko irudi batean. IDOIA ZABALETA / FOKU

Ainhoa Sarasola -

2018ko martxoak 28
Lourdes Fernandezek sei urte pasatxo eman ditu Bilboko Azkuna zentroko zuzendari. Joan den astean egin zuen ofizial bere kargua uzteko erabakia, eta haren ardura nork hartuko duen jakinarazi zuten atzo: Fernando Perez Gomezek (Sestao, Bilbo, 1967) gidatuko du zentroa maiatzaren 1etik aurrera. 2015eko abuztutik, Nafarroako Gobernuko Kultura zuzendari nagusia da Perez. Nafarroako Gobernuak eta Bilboko Udalak jakinarazi zuten albistea, eta orain arte egindako «lan bikainagatik» eskerrak eman zizkion Nafarroako Kultura Departamentuak. Bilboko Udalak proposatu du kargurako; orain, zentroko administrazio kontseiluak berretsi beharko du.

Gertutik ezagutzen du Azkuna zentroa Perezek. Bilboko Alondegia ireki zutenean —gerora Azkuna zentroaren izena hartu zuen—, kultur programazioaren zuzendaritza bere gain hartu zuen. Erakusketa, arte eta ikus-entzunezko programen koordinazioa izan zituen zeregin nagusi. Bilbon izan zen urteetan, halaber, BAD Antzerki eta Dantza Garaikidearen jaialdia zuzendu zuen, egonaldi artistikoen programa koordinatu zuen, eta programatzaile ere aritu zen Fant jaialdian, besteak beste.

Euskal Filologian lizentziatua da, eta Ikusizko Arteen Kudeaketan Nazioarteko Lidergo masterra egin zuen New Yorkeko unibertsitatean; Europako Kultur Politiketako graduondokoa Bartzelonakoan; eta Kultur Kudeaketa, Musika, Antzerki eta Dantza masterra Madrilgo Konplutentsean. Uharteko Arte Garaikidearen zentroko patronatuko zuzendari eta Oteiza Museoa Fundazioko patronatuko idazkari ere izan da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna