Txinak onartu du trabak kentzea han inbertitzen duten EBko enpresei

Astebeteko epean, Europako Batasunak akordioak lortu ditu bere bi bazkide komertzial handirekin. Erresuma Batuarekin, orain arteko merkatu bakarrari erabateko hausturak ez jarraitzeko; Txinarekin, berriz, Europako enpresek tratu hobea jaso dezaten herrialde hartan. Azken itun hori atzo lotu zuten, bideokonferentzia bidez, Ursula von der Leyen Europako Batzordeko presidenteak eta Xi Jinping Txinako presidenteak, zazpi urteko negoziazioen ondoren. Edonola ere, oraindik berretsi egin behar dute, eta agian ez du bide erraza izango, Europako Parlamentuak oso gogoan baitu Txinak Tibeten, Xinjiangen eta Hong Kongen duen jarrera zapaltzailea.

«Inbertsiorako akordioak lagundu egingo du Europako Batasunaren eta Txinaren arteko merkataritza eta inbertsio harremana orekatzen», azaldu zuen Von der Leyenek. Izan ere, EBk urteak daramatza kexuka, esanez Txinan inbertitu nahi duten bere enpresek desabantailak dituztela Txinako bertako enpresekin, dela haiekin elkartzera behartzen dituztelako, dela teknologia partekatzera behartzen dituztelako, dela diruz lagundutako enpresa publikoekin lehiatu behar dutelako. EBk dio hiru arlo horietan hobekuntzak lortu dituela dio, eta horiei esker Txinako enpresekin baldintza bertsuetan lehiatu ahal izango dutela. Trukean, Txinak berme bat lortu du orain bere enpresek EBn dituzten eskubideen inguruan, eta energia berriztagarrietan sarbide handiagoa lortuko du bere konpainientzat.

Halaber, Bruselak Txinaren konpromisoa lortu du bortxatutako lanarekin amaitzeko. Azken kontu horrek kalapita handia sortu du azkenaldian, giza eskubideen aldeko elkarteek Txinako Gobernuari leporatu diotelako milaka uigur arrazoirik gabe atxilotzea eta kontzentrazio eremuetan lan egitera behartzea. Pekinek salaketak ukatu ditu. Duela bi aste, Europako Parlamentuak aldeko 604 eta aurkako hogei botorekin salatu zuen «gutxiengo musulmanen esplotazioa».

Bidenen arazoa

Pekin-Brusela itunak hirugarren hiriburu batekin egiten du talka, Washingtonekin. Txinarentzat oso garrantzitsua zen ituna aurten lortzea: Donald Trumpen balizko bigarren agintaldi bat lortu izan balu, EB aliatu bat izan zezakeen harekiko gerra hotz berrian; Joe Bidenek irabaztekotan, eragotz zezakeen EBk eta AEBek haren aurkako fronte bat osatzea.

Bidenen garaipenak, alde horretatik, oztopo bat sortu dio EBri, haren administrazioaren helburuetako bat zelako Trumpen garaiko bakartzea utzi eta nazioarteko aliantza bat osatzea Txinaren praktika komertzial erasokorreiaurre egiteko. Txinarekin ituna eginda, proiektu hori zapuztu duela dioten ahotsei erantzun die EBk. «Atzetik genbiltzan, AEBek Txinarekin sinatutakoaren aldean», esan du Valdis Dombrovskis EBko lehendakariordeak, eta Washingtonekin elkarlanean aritzeko asmoa duela.