«Zin egiten dut leialtasunez beteko ditudala presidente karguaren betebeharrak, parlamentuan ordezkatuta dagoen Kataluniako herriarekiko fideltasunez». Quim Torrak formula horrekin hartu zuen Kataluniako presidente kargua, atzo. Carles Puigdemontek duela bi urte eta erdi egin bezala, Torrak ez zuen Espainiako Konstituzioa aipatu, eta Madrilek argi utzi du Kataluniako presidente berriaren agintaldia estu hartuko duela lehenbiziko minututik, «aztertu» eginen baitu kargu hartzea inpugnatu ote dezakeen. Bi minutu eskaseko ekitaldiak balio izan du prozesu independentistaren aurka dagoen hirukoa batzeko (PP, PSOE eta Ciudadanos), elkarrizketak hasi baitituzte neurriren bat adosteko halako zinetan Espainiako Konstituzioa aipatzea derrigortzeko.
Iragarri bezala, Torrak ekitaldi xumea eta motza egin zuen, Generalitatearen jauregiko Verge de Montserrat aretoan. Roger Torrent parlamentuko presidentea ondoan zuela, eta Generalitateko idazkaria eta Torraren senideak lekuko bakar zirela. Pedro Sanchez PSOEko idazkari nagusiak goizean bertan telebista kate batean egin zioten elkarrizketan erran zuen ekitaldia «desleiala» eta «baztertzailea» izan zela, eta jakinarazi zuen proposatuko duela goi kargudunentzat derrigorrezko izatea konstituzioari men egitea. Rafael Hernando PPk Kongresuan duen bozeramaileak baieztatu zuen PSOErekin eta Ciudadanosekin harremanetan paratu zirela horretarako.
Rajoy-Rivera bilera
Sanchez joan den asteartean elkartu zen Mariano Rajoy Espainiako presidentearekin, Kataluniako egoera aztertzeko —Sanchezek babes osoa eskaini zion—, eta, atzo, Albert Rivera Ciudadanoseko buruaren txanda izan zen. Riverak Rajoyri eskatu zion Madrilek manten dezala mossoen, TV3en eta Generalitatearen finantzen eta atzerri politikaren kontrola.
Katalunia. Kargu hartzea
«Herriarekiko fideltasunez»
Quim Torrak Kataluniako presidente kargua hartu du, Espainiako Konstituzioa aipatu gabe. Madrilek «aztertu» eginen du zin egiteko erabilitako formula. PSOEk «desleiala» eta «baztertzailea» erran dio
Iruzkinak
Ez dago iruzkinik
Ordenatu