Mont Blanceko Ultratraila. Uxue Fraile. Mendiko korrikalaria

«Gozatzeko uneak bilatu egin behar izan ditut»

Raidetan eta mendiko lasterketetan zaildua, ehun miliako lehen lasterketa zuen UTMB. Bosgarren amaitu du, asko sufrituta eta gutxi gozatuta. «Pozik egotea merezi dugu», dio.

Chamonix
2014ko irailaren 2a
00:00
Entzun
Ehun miliako estreinako lasterketa zuen Uxue Frailek (Donostia, 1974). Estreinako Mont Blanceko ultratraila (UTMB), beraz. Helburua: «Bukatzea». «Hainbeste lan egin eta gero, gozatzea eta bukatzea». Eta bosgarren egin du munduko ultratrailen erreferentzian. Korrikalarien palmaresean gehien nabarmentzen den lasterketa luzean. Hala ere, asko sufrituta eta gutxi gozatuta izan dela aitortu du, zintzotasunez.

Bosgarren. Gozatu gabe. Baina pozik. Utikan aitzakiak eta baina-k: «Agian ez ditugu helburuak betetzen eta ez dugu zure bizitzako lasterketa onena egiten; pozik egon behar dugu, pozik egotea merezi dugu, ordea, guk eta gure ingurukoek lan handia egin dugulako».

«Gozatzeko momentuak bilatu egin behar izan ditut», dio, podiumera igo baino minutu batzuk lehenago. Mont Blanc erraldoiari begiratu eta indarra ere eskatu zion, «bultzatzeko». Baina une txarrenetan, ultratrailetako korrikalari gehienen moduan, ingurukoak izan ditu gogoan, senideak eta lagunak. «Haiek nik bezainbeste merezi zuten, eta hor egon izan ez balira, agian ez nintzen helmugara iritsiko».

Tripako mina, gauaren luzea, nekea... Eskarmentuak asko laguntzen du halako egoeretan, eta Uxue Frailek badaki zer diren proba luzeak. Ez alferrik, raid-etatik iritsi zen mendiko lasterketetara. Hiru edo lau egunez ia gelditu gabe eta ia lorik egin gabe egiten diren taldekako probetatik. «Badakit gorputzak gorabehera handiak izaten dituela eta konfiantza izan behar duzu gorputzean. Hala ere, gorputzak buelta emateko gogoa izan behar duzu, bestela ez baitio buelta emango». Horrela pasatu zuen gaua, momentu hobeen zain. Kafearen laguntzarik gabe, Frailek ez baitu kaferik hartzen.

Raidetatik iritsi zen mendiko lasterketetara. 2012aren aurretik egin zuen lasterketaren bat, baina urte horretan zentratu zen mendiko lasterketetan. Besteak beste, zazpigarren izan zen Zegama-Aizkorrin eta bosgarren Cavalls del Venten. Geroztik, hamar onenen artean izan da lasterketa gehienetan, eta podium asko zapaldu ditu. Baita lasterketak irabazi ere. Ondo moldatzen da lasterketa laburretan zein luzeetan. Mendiko eskian ere bai.

Frailek bosgarren amaitu du (26:22:19), baina Fernanda Macielen laugarren postua ere ez zuen urruti (26:05:47). Frailek, ordea, ez zuen lehia hori bizitu, «sentitu»: «Azkenean asko gerturatu nintzen, baina nire helburua iristea zen. Neure buruarekin borrokatu nahi nuen, eta ez nintzen horretan sartu. Indarrak ere ez nituen soberan».

Podiumeko bozgorailuak garaileen izenak esaten ari dira. 2014ko UTMB amaitzear da, baina korrikalariek buruan dituzte hurrengo erronkak. Frailerena Reunion uharteko Diagonale des Fous da, urrian. Ehun miliako lasterketa, baina UTMBren kontrako baldintzetan. Alpeetako tontorretatik Reuniongo oihanetara eta hezetasunera.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.