Albistea entzun

Ondarroako zubi harresian jardun zuten ertzainek kalte-ordainak nahi dituzte

Protestan izan ziren bost lagunen aurkako epaiketan, kontrako bertsioak eman dituzte akusatuek eta ertzainek.

Urriaren 13an segituko du saioak
Eleak mugimenduak deituta epaitegi aurrean egin den protesta.
Eleak mugimenduak deituta epaitegi aurrean egin den protesta. M. DEL VALLE / ARP

Aitziber Laskibar Lizarribar -

2014ko irailak 25 - Bilbo

Iazko maiatzaren 15ean Ondarroan Urtza Alkortaren atxiloketa eragozteko egin zen herri harresian parte hartu zuten bost gazteren aurkako epaiketa atzo hasi zen Bilboko epaitegian. Akusatuek eta lekukoek euren lekukotzak eman zituzten: bertsio erabat kontrajarriak.

Ertzainen esanetan, zubian eserita zeuden akusatuek jarrera bortitza izan zuten. Ertzainei beraiei ostikadak eta ukabilkadak eman zizkietela salatu dute, batek hozkada jaso zuela, eta beste baten ezkutuari listua bota ziotela. Akusatuen bortizkeriaren ondorioz min hartuta egon zirela kontatu diote epaileari, eta zazpi ertzainetik seik kalte-ordainak eskatu dituzte.

Kontakizun horiek aintzat hartuta, bina urteko espetxe zigorra eta kargu publiko izateko debekua eskatzen du akusazioak bost epaituetatik lauren aurka, agintearen aurkako atentatua egin izana egotzita. Besteari, ordena publikoaren aurka egitea egozten diote. Horrez gain, 8.850 euroko isuna ere eskatzen die akusatuei.

Erlantz Alkorta, Beñat Apalategi, Breogan Fernandez, Joseba Berastegi eta Ander Malaxetxebarria akusatuek ukatu egin dituzte egozten zaizkienak. Protesta erabat baketsua izan zela esan dute. Lurrean eserita erresistentzia pasiboa besterik ez zutela egin.

Zubitik atera zituzten ertzainek, berriz, oso bortitz jardun zutela kontatu dute: lurrera jaurti, botekin zapaldu eta jo zituztela, eta sudur, begi zein belarrietatik atzamarrak indarrez sartuaz eraman zituztela.

Lekuko aritu diren herritarrek akusatuen bertsioa baieztatu dute; tartean, Unai Urruzuno eta Maribi Ugarteburu legebiltzarkideek. Auzi medikuak bi bertsioetako edozein egia izan daitezkeela esan du, eta ez dio azalpenik aurkitu ertzain batek hasieran erorita zauritu zela eta egun batzuetara ostikada batek zauritu zuela esan izanari. Bi ertzain ez dira epaiketara joan, eta epaileak urriaren 13ra arte eten du saioa.

Epaiketa hasi aurretik, elkarretaratzea egin du Eleak taldeak epaitegi aurrean. Herri harresietan bortitz jardun duen bakarra Ertzaintza izan dela ohartarazi du, eta mezua igorri Jaurlaritzari: «Ados egon gabe ere legea bete behar dutela diote; baina hemen epaituko den auzia ez da Madrilen agindua; hemen sortua da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

GKS-k manifestazio jendetsuak egin ditu Bilbon eta Iruñean

GKS-k manifestazio jendetsuak egin ditu Bilbon eta Iruñean

Berria

'Enpresarien eta agintarien erasoaldiaren aurrean, gazte langileok borrokara!' leloa ozenduko dute, gazteen artean «borrokarako borondatea» hedatzeko asmoz

 ©JON URBE / FOKU

«Adostasun berriek ahalbidetu dute bake prozesua»

Irati Urdalleta Lete

Foro Sozialaren bidea ixtear da, baina hor dago eginikoa: hamabi aholkuetatik 11 beteta edo betetzear. Eta egitekoak: adibidez, biktimen «asimetria» gainditzea. Balorazio «ona» egin dute.
Bizkaiko Batzar Nagusietan Usansoloren desanexioa bozkatu zen momentuan ©Marisol Ramirez/ FOKU

Galdakaoko Udalak demandatu gisa aurkeztea erabaki du Usansoloko auzian

Berria

Bizkaiko Batzar Nagusiek lurraldeko 113. udal gisa onartu zuten Usansolo, galdeketaren ostean, eta estatuko abokatutzak helegitea aurkeztu zuen. Galdakaoko Udalak demandatu gisa aurkeztea erabaki du, prozesu honetan egindako bidea defendatzeko.

 ©MARISOL RAMIREZ / FOKU

«Madrilen berme» mahaian

Jon Ordoñez Garmendia - Xabier Martin

PSE-EEn bide luzea eginikoa da Ares: sozialisten ordezkari 2005etik 2007ra bitarteko bake elkarrizketetan eta Jaurlaritzako Barne sailburu, besteak beste. Karguan zela hil zuen Ertzaintzak Cabacas. 68 urte zituela hil da.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.