Albistea entzun

Abiapuntu berriak ospatuz

Beietz talde arbizuarrak bere bigarren diskoa argitaratu du, 'Askatu aingura'. «Jai giroan murgiltzeko» zortzi kantuz osaturiko lana da
Larraza, Areta, Leitza, Quintana, Goikuria, Skalari, Mendinueta eta Jaka, Beietz taldeko kideak.
Larraza, Areta, Leitza, Quintana, Goikuria, Skalari, Mendinueta eta Jaka, Beietz taldeko kideak. BERRIA Tamaina handiagoan ikusi

Yasmine Khris -

2022ko maiatzak 20 - Iruñea

Bei, Arbizutik. Beietz, baikortasunetik. «Energiaz beteriko proiektua da, indartsua; eta gure hizkeraz, noski», azaldu du Hiart Leitzak, Beietz taldeko abeslariak. Hura eta bertze zazpi kide aritzen dira 2018an sortu zen taldean: Mikel Goikuria (biolina), Maider Jaka (txistua), Ainhoa Quintana (akordeoia), Martin Larraza (baxua), Oihan Mendinueta (gitarra), Ritxi Areta (bateria) eta Peio Skalari (konposizioa, produkzioa, grabazioa).

«Jai giroa elikatzeko» zortzi kantuz osaturiko lana argitaratu du, bigarrena, Arbizuko (Nafarroa) Estudio Bat diskoetxearekin: Askatu aingura. «Izena metafora bat da: norberak aska dezala zama edo daukan motxila astuna aurrera jarraitu ahal izateko. Askatasunarekin badu zerikusirik gure sorkuntzak».

2019an kaleratu zuen Erraietatik lehenbiziko diskoa taldeak, baina lehen fruitua murtxatzeko astirik gabe geratu zen. Lehen urratsak egin bitartean, pandemia heldu zen, eta bilakaera mantsotu zuen. «Galga bat izan zen guretzat, ez genuen aukera izan geure burua aurkezteko, nolabait». Ezintasun sentsazioaren aitzinean, formulari buruz hausnartu zuten. «Bigarren diskoaren prozesua luzea izan da, eta, azken finean, labean genuen hori atera dugu». Bestaren ernamuina pandemian txertatu zen, paradoxikoki.

Estiloaz galdetua, «zeltik parranda» jotzen dute. Melodian, musika tresnetan eta kideen identitatean oinarritzen dute deitura. «Horrela bataiatu genuen, abizen hori geure buruari jartzeko. Zer da? Parrandarako egokia den melodia zeltaren eta rockaren arteko fusioa». Kutsu zelta, musika tresnekin lotzen dute: akordeoia, txirula, biolina. Maila berean, rockak badu lekua, eta esperientziak osatu du hautua. Izan ere, taldekide guztiek badute ibilbide bat generoaren bertze musika proiektu batzuetan.

Alabaina, hezurdura ez da horretara murrizten; abeslariak onartu du estilo andana zabaltzea gustuko dutela. Folk estilotik ere edaten dute, baita punk, pop eta skatik ere. Musikaltasunetik haratago, baieztatu dute euskal identitatea ez dutela galdu, proiektuaren ardatzetako bat baita. «Hemengoak gara [Arbizun sortu arren, taldeak Lakuntza, Tafalla eta Aguraingo kideak ere baditu], eta zentzua aurkitu diogu nortasuna irudikatzeko manera horri».

Zuzenekoa, erdigunean. Pretentsio handirik gabe, «ongi pasatzea» xerkatu dute, artistek zein publikoak. Kantuak «zuzenean defendatzeko» asmotan baitabiltza.

«Leun bezain zorrotza»

Leitzak berak osatzen ditu hitzak; hura inspiratzen duten hainbat gairi buruzkoak dira. «Gizartean ikusten dudanaz edota inguratzen nauenaz idazten dut, mugarik gabe». Haatik, prisma pertsonaletik kanpo, musika gauza askotarako erabil daitekeela sinisten dute. Adierazi du abesti batzuek izan ditzaketela «esanahi asko», entzulearen abiapuntuaren arabera. Emakumeon borroka feminista, errefuxiatuak edo euskara maiz mahai gainean jarri dituzte kantuetan, «poesia iradokitzaile bidez, leun bezain zorrotza». Askatu aingura kantuaren bideoklipa zabaldu dute, gainera, Zumaiako hondartzako paisaian (Gipuzkoa) eta Arbizuko tabernetako giroan murgilduta.

Beietzen ekarpena bertze alderdi batzuetatik ere azal daiteke: hiru emakumek eta eskarmentua duten artistek osatuta, alaitasunaren berrasmatzearen aldeko apustua egin dute.

Lana aurkezteko bira hasi berri dute, eta kontzertu anitz dituzte iragarriak: Irurtzunen (Nafarroa) izan dira, bihar Galar Zendean joko dute (Nafarroan), eta Bizkaian lehen kontzertua maiatzaren 27an emanen dute, Bilboko Stage aretoan, Juantxo Skalari & La Rude Band taldearekin batera. «Ilusio berezia egiten digu kontzertu horrek, Skalari anaiekin arituko baikara». Ondoren, Leioan (Bizkaia) eta Puiun (Nafarroa) joko dute. Iruñeko sanferminetan dute Askatu aingura biraren azken geldialdia: «Uste dut kontzertu hori oso berezia izanen dela, festaren epizentroan». Zeltik parranda ziurtatuta, alegia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Metallica taldeak atzo iluntzean Bilbon emandako kontzertuaren irudia. ©Miguel Toña, EFE

Metalararen dardara bizia Bilbon

Berria

Zalantza egunen ondotik, Metallicak kontzertua eman du bart San Mamesen, 45.000 lagun aurrean. Niña Coyote eta Chico Tornado, Nothing But Thieves, eta The Hellacopters ere aritu dira.

Bisitari bat Donostiako Ekain galerian, Amable Ariasen zenbait lanekin irekitako erakusketan. ©JUAN CARLOS RUIZ / FOKU

Nekez zeharkatzen diren ateak

Itziar Ugarte Irizar

Ahotik ahora dabil esaldia galeristen artean: «Garai zailak dira». Ez da berria sektorearen apaltzea, arte salmentaren urritzea, baina azken bi urteetako giro nahasiak eta arteak gizartean izan duen lekualdatzeak formula berriak lantzera behartu ditu sektoreko askotariko profesionalak.

Ikusten?

Ikusten?

Arantxa Iturbe

Gaur hasten da BERRIAren aurtengo udako narrazio artikulu sorta. Arantxa Iturbe da lehen egilea.

James Hetfield abeslaria eta Kirk Hammett gitarrista, ekainaren 16an, Danimarkan. ©TORBEN CHRISTENSEN / EFE

Zalantza egunen ondotik, San Mamesen izango da gaur Metallica

Itziar Ugarte Irizar

Niña Coyote eta Chico Tornado, Nothing But Thieves, The Hellacopters eta Weezer ere ariko dira. 45.000 zalerentzako tokia dago

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.