Datorren asteko estreinaldiak

Lapur taldearen hirugarren etapa

Steven Soderberghek hasi zuen saila berpiztu du 'Ocean's Eight' filmak, emakumeei protagonismoa emanez
Besteak beste, Sandra Bullock aktorea dago emakume protagonisten artean.
Besteak beste, Sandra Bullock aktorea dago emakume protagonisten artean. BERRIA

Gontzal Agote -

2018ko ekainak 9
Lewis Milestonek ez du inoiz izan Hollywoodeko garaiko beste hainbat zuzendarik izan zuten ospea eta aitorpena. Hala ere, ibilbide luze eta emankorra egin zuen, eta, filmei ukitu pertsonala emateari uko egin gabe, genero ezberdinak landu zituen egin zituen ia 30 pelikuletan. Batzuk aipatzearren, hor dira All Quiet on The Western Front, Front Page, The Strange Love of Martha Ivers eta Mutiny of The Bounty.

Hain zuzen ere, Marlon Brandorekin lan egin aurretik, bere azken-aurreko pelikula izanen zena zuzendu zuen. 1960. urtea zen, eta Harry Brown eta Charles Lerederen gidoi baten gainean lapurretak eta komedia uztartzen zituen film bat egin zuen. Ocean's Eleven zen pelikula horren izena, eta, Milestonen aginduetara, aktore ezagun askok egin zuten lan: Frank Sinatra, Dean Martin, Sammy Davis Jr., Angie Dickinson, Richard Conte...

Urteen poderioz, pelikula hori ahanzturaren zulo beltzean galtzen joan zen, harik eta 2001. urtean ibilbide gorabeheratsua izan duen beste zinemagile interesgarri batek errekuperatu zuen arte. Ordurako, Sex, Lies and Videotapes, Traffic eta Erin Brockovich filmak eginak zituen Steven Soderberghek; hala ere, ez zuen lortzen zinema komertzialaren lehen mailan sartzea.

Ocean's Eleven-en bertsio berriak horretarako aukera paregabea eskaini zion. George Clooneyk jarri zuen pelikularako finantzaketa, eta aktorea bera izan zen lapur taldearen buru. Haren ondoan, oso izen ezagunek hartu zuten parte remake horretan: Julia Roberts, Matt Damon, Brad Pitt, Cassey Affleck eta Andy Garciak.

Filmak arrakasta handia lortu zuen, eta haren segidan beste bi etorri ziren, Ocean's Twelve eta Ocean's Thirteen, biak ala biak Soderberghek zuzendutakoak. Filmotan oinarrizko aktore taldea mantentzea lortu zuen, eta akzioaren eta ukitu vintage-aren arteko nahasketak emaitza onak utzi zituen txarteldegian.

Aldaketa nabarmenak

Azken pelikulatik 11 urte pasatu direnean, Gary Ross zuzendariaren eskutik saila berpiztu dute. Nolanahi ere, ez da zuzendari berriarena aldaketarik esanguratsuena, protagonista aldaketarena baizik.

Clooney, Pitt eta enparauak desagertu dira pelikula berritik, eta, haien ordez, emakumezkoek hartu dute agintea. Izan ere, Debbie Ocean Dannyren arreba da protagonista nagusia, egin nahi duen lapurreta handi baterako haren inguruan talde bat bilduko duena.

Horrela, Ocean's Eight-en ezagunak diren emakumezko aktoreak daude rol nagusietan: Anne Hathaway, Sandra Bullock, Cate Blanchett, Helena Bonham Carter eta Dakota Fanning. Horiez gain, bestelako pertsonaia ezagunek ere agerpen laburrak dituzte pelikulan, hala nola Maria Sharapova tenislaria eta Matt Damon bera.

'OCEAN'S EIGHT'

Zuzendaria. Gary Ross.

Aktoreak. Sandra Bullock, Cate Blanchett, Anne Hathaway, Helena Bonham Carter.

Herrialdea. AEB.

Urtea. 2018.

Iraupena. 110 minutu.

Generoa. Akzioa.

Asteazkenean estreinatuko dute Ipar Euskal Herrian.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna