Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Datorren asteko estreinaldiak

Egokitzen jakin izan duen jurasikoa

Sasoi betean, bosgarren atalera iritsi da Steven Spielbergek hasitako saila, Juan Antonio Bayonaren gidaritzapean
Bayonak Jeff Goldblum aktorea berreskuratu du Ian Malcolmen rola egiteko, <em>Jurassic Park III</em>-tik desagertua zegoena.
Bayonak Jeff Goldblum aktorea berreskuratu du Ian Malcolmen rola egiteko, Jurassic Park III-tik desagertua zegoena. BERRIA Tamaina handiagoan ikusi

Gontzal Agote -

2018ko ekainak 2

Ia oharkabean, 25 urte igaro dira Steven Spielbergek Jurassic Park egin zuenetik: Michael Crichtonen eleberriaren gainean, dinosauroen inguruko pelikula ikusgarria izan zen. Bertan erabili zituzten efektu bereziek zeresan handia eman zuten, garai horietarako erabat berritzaileak baitziren.

Ez zen inondik inora Spielbergen pelikularik onena, baina zinemagileak inork baino hobeto daki kalitatezko lanak eta zinema komertziala uztartzen. Dudarik ez da: bete-betean bigarren multzoan sartzen da Jurassic Park, arrakasta komertzial izugarria izan zuena. Eta ez soilik filmak lortu zuen harreragatik, haren inguruan sortu zen merchandising produktu ugariengatik ere: miniaturak, biserak, kamisetak...

Lau urte geroago bigarrena ailegatu zen, The Lost World: Jurassic Park. Berriro ere Steven Spielberg zuzendariaren aulkian, berriro ere Crichtonek idatzitako materiala izan zen lehengaia. Eta, lehengoaren mailara ailegatu ez bazen ere —Titanic-en urtea izan zen hura—, bigarrengoak ere egundoko arrakasta komertziala eskuratu zuen.

Dinosauroen abenturen lehen etapa ixteko, 2001ean hirugarren filma iritsi zen. Izenburutik beretik antzematen zen formula agortuta zegoela, eta ez zela irudimenerako tarte handirik: Jurassic Park III tristea jarri zioten. Horrez gain, Spielbergek Joe Johnstoni utzi zion bere lekua, eta Jeff Goldblum aktorea desagertu egin zen. Horiek horrela, nahiko txarrak izan ziren kritikak, eta uharteko saurioen abenturak hor bukatuko zirela ematen zuen.

Bigarren etapa

Kontuak oso bestelakoak izan ziren, ordea. 2015ean, Jurassic World pelikulak frankizia berpiztu zuen. Nublar irla parke tematiko bihurtuta, genetikoki sortutako dinosauro batek hankaz gora jarriko du bertako lasaitasuna.

Colin Trevorrow izan zen mundu jurasikoari hats berria eman ziona, baina askok Spielbergen beraren eskua ikusi zuten haren atzean. Nolanahi ere, eta askoren harridurarako, laugarren pelikulak egundoko arrakasta eskuratu zuen, eta sail osoko errentagarriena bihurtu zen. Areago, zinemaren historiako takilan diru gehien bildu duen laugarren pelikula bihurtu zen. Hogei urte pasatuta, dinosauroen negozioa bizi-bizirik zegoen.

Horrela ailegatu gara 2018ra. Spielbergen kutuna den Juan Antonio Bayonak zuzendaritza ardura bereganatu, eta haren eskutik etorri da Jurassic World: Fallen Kingdom, saileko bosgarren atala.

Aurreko filmak langa oso altu jarri zuenez, ez da erraza izanen hura gainditzea. Aktore talde bera mantenduta, zaleentzat oso maitea zen pertsonaia bat berreskuratu du Bayonak, Jeff Goldblumek jokatzen duen Ian Malcolmena.

Istorioak aurreko filma bukatu zen horretan segitzen du. Parke tematikoa desagertuta, dinosauroak berriro libre daude Nublar irlan. Orain, beste arrisku bati egin beharko diote aurre: sumendi batek irla osoa suntsitzen ahal baitu.

'JURASSIC WORLD: FALLEN KINGDOM'

Zuzendaria. Juan Antonio Bayona.

Herrialdea. AEB.

Aktoreak. Chris Pratt, Bryce Dallas Howard, James Cromwell, Rafe Spall.

Urtea. 2018.

Iraupena. 128 minutu.

Generoa. Akzioa. Zientzia fikzioa. Abentura.

Asteazkenean estreinatuko dute Ipar Euskal Herrian, eta ostiralean Hego Euskal Herrian.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Netflix Euskaraz ekimenaren agerraldia, apirilean, Durangon (Bizkaia). ©Endika Portillo / Foku

Espainiako Gobernuko iturriek esan dute atzerriko plataformek ez dutela %6ko kuotarik bete beharko

Urtzi Urkizu - Paulo Ostolaza

Gaur onartu dute Espainiako ikus-entzunezkoen lege berria, eta hainbat hedabideren arabera, Netflixek, Disney Plusek, HBO Maxek eta Amazon Prime Videok ez dute edukiaren %6 gutxienez euskaraz, katalanez edo galegoz izan beharko. ERCk iragarri du emendakinak aurkeztuko dizkiola testuari.

'Leonard' kometa, azaroaren 19an, Mungiatik ateratako argazkian. / ©Alex Escartin

'Leonard' kometa ez da hautsi, eta datorren astean begi hutsez ikusi ahal izango da

Jon Ordoñez Garmendia

Espero zen bidea egiten ari da Leonard kometa, eta datorren astean begi hutsez ikusi ahal izango da Euskal Herrian. 80.000 urtean behin hurbiltzen da Lurrera.

Iruindarrak <em>Agur, jaunak</em> kantatzen, San Saturnino egunean, atzo, Iruñean. ©OLAIA L. GARAIALDE

Kanta-kantari iruindarrak

Olaia L. Garaialde

Kantuan eta dantzan, iruindarrek San Saturnino eguna ospatu dute arkupeetan babestuta. Euria dela eta, bertan behera utzi behar izan dituzte Iruñeko Udalak antolatutako gauza gehienak: besteak beste, erraldoiak.
1 ©JAIZKI FONTANEDA / @FOKU

Jaien itzulera, kolokan

Amaia Ramirez de Okariz Kortabarria

Herrietako festak itzuliko zirela zirudien, baina koronabirus kasuak ugaritu egin dira, eta bertan behera utzi dituzte hainbat. Herri batzuetan, ordea, lehenago edo geroago izan, jaiak ospatzeko aukera izan dute, betiere osasun neurriak gogoan izanda. Gehienek garaian garaiko egoerara egokitu dute egitaraua.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.