Albistea entzun

Lehengo Greziaren oroigarri bat

Errobiko 21. Festibala eginen dute Itsasun gaurtik igandera bitarte. 'Antigona-Argia' estreinatuko dute, jaialdirako preseski sortutako ikuskizuna. Besteak beste,. Daniel Waro Reunion uharteko musikaria bertan izanen da
Christine Salem Reunion uharteko kantaria, 2013ko Errobiko Festibalean.
Christine Salem Reunion uharteko kantaria, 2013ko Errobiko Festibalean. BOB EDME Tamaina handiagoan ikusi

Bidatz Villanueva Etxague -

2016ko uztailak 21

Bi hamarkada igarota, sorkuntza iturri amaiezina da oraindik ere Errobiko Festibala. Aurten, 21. aldia eginen dute. Gaur hasita igandera bitarte, tailer, eztabaida, ikuskizun, kontzertu eta bestelakoez gozatu ahalko dute Itsasura (Lapurdi) bertaratzen direnek. Izan, erran, sortu leloa du oinarri, eta festibala kulturen arteko topaketa bat izatea lortu nahi dute. «Kreolitatea lantzen dugu», azaldu du Julen Axiari antolatzaileak, Martinikan sortu zen literatur mugimenduari eta pentsaerari erreferentzia eginez. «Besteekiko erlazio bat ukanik, hortik zerbait berri ateratzen saiatzen gara, eta, hortik segituz, gure herrialdean zerbait eraikitzen dugu». Hala, urtero bezala, nazioarteko hainbat artista ere gomitatu dituzte.

Hasiera ekitaldiaren ondoren eginen dute ikuskizun handia, 21:30ean: Antigone-Argia, festibalerako preseski sortua. Mota askotako dantza, kantu eta erritmoak uztartuko dituzte; Antigona Greziako pertsonaia mitologikoaren istorioan eta Oedipe sur la route (Edipo bidean) liburuan oinarritutako ikuskizuna da. Greziako bikote baten kontzertua izango da gero. Angelique Ionatosek eta Katerina Fotinakik beren herrialdeko historia dute kantuetan hizpide. «Musika izugarria da, dentsitatez betea», Axiarik adierazi duenez. Festibalean ez dira kasualitatez Greziara begira jarri. «Alde handia dago izan zenaren eta orain denaren artean», antolatzailearen ustez. Iraganari keinu moduko bat da.

Festibaleko apustu handietako bat da Danyel Waro Reunion uharteko musikaria, Itsasun hirugarren aldiz izanen dena. Hark eskainiko duen musikak dantzaraziko du publikoa, kayamb instrumentuaren erritmoan. Goi mailako musika da, Axiariren esanetan, baita sentsibilitate handikoa ere: «Dantzatzeko musika da hasieratik bukaeraraino, baina badu esklaboen indartasuna eta zentzua». Izan ere, esklabo izandakoen maloya kantak berpiztu zituen Warok, eta haiek interpretatzen ditu gaur egun bere emanaldietan.

Beste musika estilo batzuk ere entzun ahalko dira festibalean. Bihar, uztailak 22, bikotea osatuta ariko dira Joseba Irazoki eta Beñat Axiari. Blues musika joko dute. Gero, jazz doinuak izango dira entzungai, Andy Emler, Claude Tchamitchian eta Eric Echampardek osatutako hirukotearen eskutik. «Istorio kontalariak dira, musika orkestrala ematen dutenak», Axiariren arabera. Inprobisaziorako parada ere izanen dute. Izan ere, hamazazpi urteko ibilbidearen ondoren aski ongi ezagutzen dute elkar.

Gaueko ikuskizunen ondoren, Batouto izenburupeko emanaldiak eginen dituzte gaur, bihar eta etzi. Gauero, hiruzpalau musikari elkartuko dira, oihal etxe baten pean, Batoutoen denda deiturikoan, eta batzuetan inprobisatuz, besteetan prestaturiko piezak joz, ongi pasatzeko eta dantzatzeko parada eskainiko dute, antolatzaileen ustez. Baina Batouto beste zerbait ere bada. «Eduard Glissant idazleak asmaturiko populu bat da, irudimenaren gauza bat. Horrek festibalean aukera anitz ematen dizkigu», azaldu du Axiarik. Batoutoen denda-tik ere iraganen dira hainbat musikari ostiral eta larunbat arratsaldez.

Solasaldi eta tailerrak ere antolatu dituzte. Gaur, esaterako, hasiera baino lehen, kreolitatearen inguruko eztabaida bat izango da, 17:00etan. Larunbatean, solasaldi bat eginen dute Waro musikariarekin, goizeko hamarretan. Bestalde, ostegun eta ostiral arratsaldez, kafearen orduan, Liburutegi nomada eginen dute, musika, dantza, kantuak eta hitzak partekatzeko. Horrez gain, musika ibilaldi bat ere antolatu dute, basoan zehar.

Urteroko hitzordua

Marie-France Aured urtero-urtero izan da festibalean, eta, haren esanetan, parte hartzen duen oro itzultzen da. Aured da festibala aurrera ateratzeko lan egiten duten ehun boluntarioetako bat. «Jende askok oraindik ez daki festibala existitzen denik ere, baina ezagutzen dutenean beti itzultzen dira. Oso familiarra da, lasaia, eta Itsasu oso herri polita da. Paisaiak lasaitasuna ematen du».

Jatekoa eta edatekoa ere izanen dira festibalak iraunen duen lau egunetan. Egunero proposatuko dute afari bat, 13 euroan. Bazkaria, berriz, larunbatean soilik eginen dute. Dena den, taloak eta bestelako jakiak salduko dituzte gune batean. Axiariren esanetan, Plantxa Izozkiak dira aurtengo berritasuna, «gauza harrigarri bat».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Maialen Lujanbiok idatzi du liburuko testua, eta Arrate Rodriguezek ondu ditu ilustrazioak. Irudian, bi egileak, atzo, Donostian. ©JAGOBA MANTEROLA / FOKU

'Traste arrunten barruan zuk zer ikusten duzu?' album ilustratua argitaratu dute

Miren Mujika Telleria

'Traste arrunten barruan zuk zer ikusten duzu?' album ilustratua argitaratu dute Maialen Lujanbiok eta Arrate Rodriguezek, Pamiela argitaletxeko Bagara sailean. Albumak Rosa Valverde artistaren lana ezagutaraztea du xede

Alena Baeva biolinista. ©ANDREJ GRILC

Beethovenen 'Bosgarren sinfonia' interpretatuko du Euskadiko Orkestrak

Erredakzioa

Dinis Sousak aurrenekoz zuzenduko du orkestra denboraldiko bosgarren programan. Hilaren 3tik 9ra izango dira kontzertuak
Joxean Fernandez, Maria Pilar Rodriguez, Isabel Herguera, Izaskun Arandia eta Bingen Zupiria, liburuaren aurkezpenean. ©Jagoba Manterola / Foku

'Euskal emakume zinemagileak' liburua plazaratu dute

Andoni Imaz

Euskal Herriko zinemagintzan «funtsezkoak» izan diren emakumezko zuzendariak ditu ardatz, eta Euskadiko Filmategiak eman du argitara. Maria Pilar Rodriguez ikertzaileak koordinatu du artikulu sorta.

Inauteri giroan murgilduko du herria festibalak. ©GUILLAUME FAUVEAU

Inauterietako dantzak eta musika batuko ditu Hartzaro festibalak

Berria

Otsailaren 10etik 21era egingo dute Uztaritzeko jaialdia, udaberriari ongietorria emateko asmoz

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...