Bulegotik kalerako aldarrikapena

Bizkaiko bulegoetako langileak beren borroka kalera ateratzeko baliatzen ari dira aste hau. Greba eguna izan zuten atzo, eta deitzaileek adierazi zuten lanuztearekin bat egin zutela sektorea osatzen duten 23.000 langileen %75ek. Gaur ere greba eguna izango dute, eta ikusteko dago nolakoa izango den jarraipena. ELAk, CCOOk, LABek eta UGTk deitu dute lanuztera, eta CGTk, ESK-k eta CNTk babestu dute. Bi greba egun horiekin lortu nahi dute langileen baldintzak aintzat har daitezen hitzarmena berritzeko negoziazioetan. Finean, 2012. urteaz geroztik izoztuta dauzkaten soldatak egungora egokitzeko eskaera egiten ari dira.