Hezkuntza. Ziburuko ikastolaren aurkako epaiketa. Paxkal Indo. Seaskako lehendakaria

«Asteartean haurrekin joanen naiz ikastolara»

Astelehenean emanen du epaileak Ziburuko ikastolaren aurkako auziaren deliberoa. Paxkal Indok ez du kanporaketa bat izanen denik sinesten, ez eta «sinetsi nahi ere».
SYLVAIN SENCRISTO

Itxaso Cuevas, Berriemaile berezia -

2014ko abuztuak 30
Pauen Ziburuko ikastolaren aurka atzo iragan zen auzian, Seaskako eta ikastolako ordezkariak izan ziren. Paxkal Indo (Donibane Lohizune, Lapurdi, 1969) Seaskako lehendakariak epaiketaren balorazioa egin du.

Ziburuko ikastolaren aurkako azken auzia izanen al da hau?

Ez, ez da azken urratsa. Epaileak, sekula, kasua aztertzeko gai ez dela erraten badu, funtsezko auzitegira joan beharko dugu, eta hor luzeagoa izanen da prozedura: urrira arte ez genuke deus jakinen. Baina hobe auzitara jo behar izanen ez bagenu. Gaur [atzo] epaitegian gaude auzapezaren nahikeriagatik.

Larzabaleko Kolegioan lekua dagoela erran dute berriz ere.

Egia da argudio hori atera dutela, baina ez da egia. Ez da lekurik. Kolegio batean kirol anitz egiten da, eta kirola egin ahal izateko eremu bat behar da. Ikastola, nahiz eta txikia izan, bungalow bat izan arren, hor kokatuko bagina, eremu hori txikituko genuke. Horri gehitu behar zaio kolegioan geroz eta haur gehiago direla. Beraz, ez dago lekurik.

Bestalde, Dubarbier Hezkuntza hautetsiak erran du haurrak Urruña edo Donibane Lohizuneko ikastolara joan daitezkeela.

Bai, Dubarbier anderea entzun dugu goiz honetan [atzo] Ziburuko Herriko Etxearen ordez hitz egiten, eta mingarria izan da entzutea Urruñan zein Donibanen diren ikastoletan lekua dagoela. Horrek argiki erakusten du Ziburun ez dutela ikastolarik nahi.

Zer gertatuko litzateke astelehenean kanporaketa agindua emango balu epaileak?

Nik ez dut sinetsi nahi kanporaketarik izanen denik, ez dut sinesten ahal ere. Astelehenean kanporaketa agindua ematen bada, ni asteartean ikastolara joanen naiz hamabi haurrekin.

Zein balorazio egiten duzue azken bi urte hauetan Seaskak jasandako erasoen inguruan?

Nik ez nuke horrela hartuko, egia erran. Hitzarmen bat dugu estatuarekin, eta hitzarmen hori ikastolen garapenarentzat pentsatua izan zen. Orain dela bi urte ohartu gara gaur egungo legeek ez ziotela erantzuten estatuarekin dugun akordioari. Lege berri bat aurkitu behar dugu gure sarea defenditzeko.

Seaskak 45 urte bete ditu aurten. Nola kokatzen dituzue jasandako oztopoak?

Seaskaren genotipoan borroka bada. 45 urteko borroka izan da Seaskaren sortzea eta biziaraztea, eta militanteak izanen direino Seaska izanen da. Ez dut duda izpirik horretan. Borrokatzaile izan behar gara, gauzak ez baitira errazak.

Hezkuntza Nazionalaren babesa duzue. Ez al da arrazoi garrantzitsu bat Ziburuko ikastolaren segida segurtatzeko?

Bistan dena, ez da dudarik. Gure hitzarmenean, estatuarekin dugun hitzarmenean, bada Ziburuko ikastolaren proiektua. Hezkuntza Ministerioarekin eta Hezkuntza Nazionalarekin dugun hitzarmenean emana da, testualki, Ziburuko ikastola eraikiko dugula hiru urte hauetan. Nik erran dezaket, dena den, orain arte egin diren ikastolak herri ekimenez sortu direla, herri nahikeriaz, eta ez du auzapez batek oztopatzen ikastola baten sorrera herri batean. Ziburun Ikastola bat eginen da, Seaskak nahi duelako, gurasoek nahi dutelako eta haurrek eskubidea dutelako. Ez da besterik.

Lege aldetik zein babes espero duzue? Zer aldatu beharko litzateke Ikastola bermatzeko?

Gure misioa babesten duen lege bat nahi dugu. Arazoa da Poulouk ez duela ikastolarik nahi Ziburun. Legea gure aurka baliatzen du, gure kontra ez dagoelarik ezer. Hark dio ikastola dagoen lurra berreskuratu nahi duela, berea delako.

Poulou ez ote da Frantziako Gobernuarekin kontraesanean?

Urrunago joanen nintzateke. Horrek erakusten du Poulou bakarrik dela. Erran nahi baitu, istorio honetan, beste hautetsiekin ez duela partekatzen. Bizpahiru ditu baizik inguruan, herriko etxea eramaten dutela horien artean. Hor erakusten du, berriz ere, nola ari den gizon hori, bere kabuz, dena desegiten eta dena erabakitzen bere herrian.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna