ATZEKOZ AURRERA. Nekane Juanes. Askekintzako kidea

«Beganismoa ez da moda bat, jarrera politiko bat baizik»

Donostian janari guztia begetala duten jatetxeen gida aurkeztu du Askekintza elkarteak. Juanesek azaldu du beganismoa hedatzen ari dela pixkanaka, eskaria dela eta.
ASKEKINTZA ELKARTEA

Ainhoa Zaragueta Lasa -

2016ko uztailak 1

Beganismoak zabalkunderako pauso txiki bat egin zuen aurreko astean Donostian (Gipuzkoa). Askekintza elkarteak Donostiako jatetxe begetariano eta beganoen gida aurkeztu zuen, eta han egon zen Nekane Juanes (Oiartzun, 1987) elkarteko kidea. Beste kideekin batera, Donostiako tabernetan eta jatetxeetan ibili da Juanes gida hori sortzeko eta eskari beganoari erantzuteko.

Beganismoa berritzat dute askok. Zer-nolako harrera dute horrelako egitasmoek?

Gure elkarteak gida beganoaren aurkezpena egin zuenean, oso arrakastatsua izan zen. Oso harrera beroa jaso dugu, eta jendeak interes handia agertu du. Elkartean egunero jasotzen ditugu mezuak beganismoari buruzko galderekin eta elkartearen ekintzen inguruan.

Beganismoaren inguruko aurreiritzi asko daude?

Gaiaren inguruan ezjakintasun handia dago, eta askotan esan ohi da beganismoa ez dela dieta osasuntsua. Edonola ere, beganismoaren inguruan ulertu behar den kontzeptu oinarrizkoenetako bat da ez dela dieta bat. Beganismoa ez da moda bat, jarrera politiko bat baizik. Animaliak jateko ez diren pentsamendutik abiatzen da; gure maila berean daude animaliak, eta bizi egin nahi dute.

Entsalada soilik jaten duzuela esaten duenik ere bada.

Badirudi animaliak kenduta ez dagoela ezer jateko, eta gezurra da: gauza asko daude jateko, eta, askotan, beganismoak beste jaki batzuk ezagutzeko aukera ematen du. Oinarrizkoena informatzea da.

Ez da lan makala beganismoa jendeari ulertaraztea. Zergatik ez da gizartean gehiago ezagutarazten?

Gure gizarteak eta kulturak animalien gainetik gaudela erakutsi digute beti. Industriaren zati handi bat animaliak erabiltzean oinarritzen da, eta, ondorioz, ez zaio interesatzen horri aurka egitea. Gure elkartekook jendeari hori erakusten saiatzen gara, eta liburuak, dokumentalak, filmak eta abar gomendatzen ditugu.

Zaila da beganoa izaten hastea?

Beganismoa ez da zeure buruari inposatzen diozun jateko modu bat. Norberak sentitzen duelako egiten da; ez zaitu inork behartzen. Kasu batzuetan, elikadura estiloa aldatzeko beharrak egoten dira, eta inposatuak dira. Baliteke hasieran zailtasunak edukitzea, elikadura aldatzeak eta ohitzeak denbora eskatzen duelako. Hala ere, geroz eta eskaintza handiagoa dago, eta errazagoa da beganoa izatea.

Beraz, ez da zaila elikadura hori izatea.

Ez, ez da zaila. Askekintzakoek errezetak jartzen ditugu Facebooken, eta erakusten saiatzen gara elikatzeko modu hau ez dela zaila, ezta garestia ere. Beganoek sukaldaritzaz asko jakin behar duten ustea ere badago. Eguneroko elikadura erraza eta goxoa izan daiteke.

Jatetxeak prest daude menu begetalak eskaintzeko?

Gida hau egiterakoan konturatu ginen jatetxe eta taberna askok, nahiz eta janari begetala izan, ez zutela horren berririk ematen. Ondorioz, menu horretan interesatuta gaudenok ez gara horretaz jabetzen. Gaur egun, irekitzen diren jatetxe berriek menu begetalak eskaintzen dituzte. Geroz eta eskari handiagoa dagoenez, nabaria da sektorean konturatu egin direla.

Zer gomendatuko zenioke begano hasiberri bati?

Informatzea oso garrantzitsua dela eta badirela trikimailuak etxetik kanpo ere osasuntsu eta ondo jateko. Jatetxearekin aldez aurretik harremanetan jartzeak eta menu begetala eskatzeak, esaterako, asko laguntzen du.

Pausoz pauso joan da elkartea. Zein ibilbide egingo du egitasmo honek?

Jasotako harrera ona ikusita, gidaren asmoa da urtero pixkanaka berrituz joatea, eskaintza begetala handituz doan heinean. Gidari esker, espero dugu bai jatetxeek eta bai jendeak guregana jotzea, eskaintza ahal den moduan zabaltzeko. Gure helburua da gizarteari helaraztea beganismoa bizimodu bat dela, elikatzeko modu bat izateaz gain.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Santos Indurain kontseilaria prentaurreko batean, artxiboko irudian. ©Jesus Diges/EFE

324 kasu atzeman dituzte Hego Euskal Herrian

Berria

Kasuen beherakada orokorra izan da herrialde guztietan: Araban 44 kasu detektatu dituzte (-31); Bizkaian, 180 (-31); Gipuzkoan, 35 (-29); eta Nafarroan, 59 (-87). Nafarroako Gobernuak ez du neurri orokorrik ezarriko oraingoz. «Atzokoa ez zen alarma guztiak pizteko modukoa, eta gaurkoa ez da kriskitinak jotzekoa», adierazi du Santos Indurain Osasun kontseilariak.

Gizon bat PCR proba egiten, Donostian. ©Gorka Rubio / FOKU

Hogei milioi koronabirus kasu baino gehiago detektatu dituzte mundu osoan

Oihane Puertas Ramirez

COVID-19a 188 herrialdetara iritsi da, eta 736.000 lagun baino gehiago hil ditu.

Zahar etxe bateko egoiliarrak paseoan, artxiboko irudian. ©Marisol Ramirez/FOKU

Donostiako zahar etxe bateko egoiliar batek positibo eman du

Berria

Zahar etxe bereko bi langile ere kutsaturik daude.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Agerraldi bat detektatu dute Murillo el Fruto eta Zarrakaztelu inguruan

Berria

30 positibo atzeman dituzte; gehienak, laborarien artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria