ATZEKOZ AURRERA. Santi Ochoa. Argazkilaria

«Identifikatzeko bidea dira elastikoak»

Poliziaren aurkako elastikoei ateratako argazkiez osatutako erakusketa osatu du Ochoak. Herritarrek Poliziari dioten ezinikusia jaso nahi izan du 'La Guerra de las Camisetas' erakusketan.
FOTOSDECAMISETAS

Kerman Garralda Zubimendi -

2017ko abenduak 14
Santi Ochoak (Madril, 1947) bere burua ez du argazkilaritzat, baina 25.000 argazki baino gehiago egin ditu. Denetan, elastiko aldarrikatzaileak dira protagonistak: besteak beste, ingurumenaren aldekoak, monarkiaren aurkakoak eta Poliziaren kontrakoak. Gasteizko ZAS Eraikinean daude ikusgai, La Guerra de las Camisetas (Elastikoen Gerra) izeneko erakusketan.

«Iraultza elastikoekin izango da edo ez da iraultza izango», esan zenuen aurkezpenean.

Gizartea hobeto antolatzen da herri mugimenduen bidez, alderdi politikoen edo erakunde burokratizatuen barruan baino. Adibidez, Juan Carlos I.ak abdikatu zuenean, arratsalde hartan bertan, 20.000 lagun baino gehiago elkartu ziren Puerta del Solen [Madrilen]. Asteburuan, berriz, alderdi errepublikazaleek antolatutako deialdira hamar bider jende gutxiago agertu zen, nahiz eta antolatzaileek elementu propagandistiko guztiak martxan jarriak zituzten.

Gara daiteke herri mobilizaziorik elastikorik atera gabe?

Gaur egun, edozein mugimendu sozial, aldarrikatzaile, artistiko... elastikoak ateratzean errotzen da. Protesta guztiak elastiko berdinarekin egitea manifestatzeko era identitario bat da, mugimenduak duen gizarte onespen maila osoaren isla. Mugimenduarekin identifikatzeko bidea ere badira elastikoak.

Ez al da merchandising-a?

Elastikoak ez dira dirua ateratzeko saltzen. Ahalik eta merkeena saltzen dira, mezua ahalik eta gehiena zabaltzeko. Dagoeneko ez dira finantza bide gisa saltzen; talde izaera sustatzeko saltzen dira.

Modan daude elastiko aldarrikatzaileak?

Elastikoek betidanik izan dute mezu lotsagabe, iraultzaile, aldarrikatzaile... bat. Zaila da zehatz-mehatz esatea, baina Madrilen punk mugimenduarekin batera hasi ziren elastiko errebeldeak. Orain, 25.000 elastikori baino gehiagori argazkia atera diedanean, askotan pentsatzen dut denak ikusiak ditudala. Baina elastikoen mundua birsortu egiten da. Beti dago borrokatzeko edo salatzeko kausa bat, eta beti egongo da horren inguruko elastiko bat.

Mozal legea-rekin, elastikoak zigorgarriak dira. Elastikoak benetan dira arriskutsuak? Justifikatuta dago zigorgarriak izatea?

Erakusketa neurri horren aurkako aldarri bat da. Elastikoak ez dira erasokorrak. Alderantziz, eraso sentitzen gara kamiseta jakin bat eramateagatik zigortzen gaituztenean.

Arazorik izan duzu inoiz?

Ezer aipagarririk ez. Nire abokatuak esan zidan gorroto delitua egiteagatik zigortu nazaketela, baina nik ez dut gorrotoa sustatzen. Herritarrek Poliziarekiko duten ezinikusia besterik ez dut jasotzen erakusketa honetan.

Elastikoak modu egokiak dira mezuak zabaltzeko?

Nire ikasle garaian, grisen aurretik korrika egitean, askok galdetzen zidaten ea ezer lortuko genuen horrela. Ez balu ezertarako balio, Polizia ez zen gure atzetik etorriko. Elastikoen mezuak ez balira zabalduko, alferrikako zerbait lirateke, ez lukete horrelako interesik edukiko haiek zapaltzen. Mina egiten duena bakarrik zapaltzen dute.

Noraino heldu behar du debekuak?

Debekua ez da ona edo txarra, egoeraren araberakoa da. Mugak beharrezkoak dira denon ongizatea babesteko.

Osasungarria da dena esan ahal izatea? Elastikoei mugak jarri behar zaizkie?

Hori norberaren irizpidea da. Nik ez ditut elastikoak egiten, soilik argazkiak ateratzen dizkiet. Baina elastiko naziak, eskuindarrak, arrazistak, matxistak... badira, ez diet argazkirik ateratzen.

Argazkietan hartzen dituzun elastikoak nolakoak dira? Zein mezu daramate?

Kirol elastikoak, korporatiboak, turistikoak... alboratu egiten ditut, eta politikan zentratzen naiz. Denetariko azpimultzoak ditut: monarkiaren aurkakoak, kapitalismoaren kontrakoak, feminismoaren aldekoak, klase borrokakoak...

Umorea eta kritika ongi nahasten dira elastikoetan?

Umorezkoak dira nire gustukoenak. Umorez helarazitako mezuak beti barneratzen ditugu gehiago. Behin, marka komertzialak parodiatzen zituzten 200 kamiseten argazkiekin osatutako erakusketa bat prestatu nuen. Gauza hutsala dirudi, baina klase borroka oso ongi islatzen zuen.

Zerk motibatzen zaitu horrelako erakusketak antolatzera?

Kontzientziak xaxatu nahi ditut. Argazkietan hartzen ditudan elastiko guztiek ideologia zabaldu nahi dute, eta nik gauza bera egin nahi dut: argazkien bidez ideologia ezkertiarra zabaldu. Ni konplize bat besterik ez naiz, mezu bat zabaltzen ari diren elastikoak bildu, eta are zabalkunde handiagoa ematen diet.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Kerman Garralda Zubimendi

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna