ATZEKOZ AURRERA

Urte berriaren sua piztu dute

Aste honetan, urte berriaren Newroz jaia ospatu dute Ekialde Hurbileko hainbat herrialdetan. Bilbon ere egin dute festa hori, Kurdistanen aldeko elkartasun keinu eta aldarrikapen artean.
Kurdistanen aldeko elkartasun keinu ugari egon ziren atzoko Newroz urte berri hasieraren ospakizunean, Bilbon.
Kurdistanen aldeko elkartasun keinu ugari egon ziren atzoko Newroz urte berri hasieraren ospakizunean, Bilbon. MARISOL RAMIREZ /FOKU Tamaina handiagoan ikusi

Lander Muñagorri Garmendia -

2018ko martxoak 24

Kurdistango herriaren aldeko elkartasunak eta festa baten ospakizunak bat egin zuten atzo Bilbon. Aste honetan, urte berriaren hasiera edo Newroz ospatu dute Ekialde Hurbileko hainbat lurraldetan, tartean baita Kurdistanen ere. Eta jai horren oihartzuna Euskal Herrira iritsi da. Urte berri hasiera gatazkatsua izan da, gainera, aste honetan sartu delako Turkiako armada Afrin hirira. Horregatik, bi gertaera horiek bat egin zuten atzo Bilbo Zaharreko plazan.

Ekialdeko agintarien jarrera salatuz abiatu zuten ekitaldia Kurdistanekin Elkartasuna taldeko kideek, eta Afringo bonbardaketetan hildako bost gudari internazionalistak ere omendu zituzten: Samuel Prada Leon, Anna Campbell, Olivier Francois Jean Le Clainche, Alina Sanchez eta Haukur Hillmarsson. Gudari horien elkartasuna goraipatu zuten, eta eurekin batera borrokan aritu ziren hiru gerrillarik hitza hartu zuten.

Mintzaldi horien ondoren, su txiki bat piztu zuten, hori baita Newroz jaiaren ekitaldi nagusia. Plazan bilduta zeuden ehunka pertsona inguruk suaren inguruan dantza edo salto egin zuten. Horrela ospatu zuten urte berriaren etorrera. Ekitaldian ez zen musika eta janari kurdurik falta izan, horrek ere balio izan baitzuen urte berriaren etorrera ospatzeko. «Afrin inguruan eta Kurdistanen egoera oso gordina bada ere, ospatu egin behar dugu urte berria, etsaiak hori nahi duelako: kurduak triste egotea», azaldu zuen ekitaldia hasi baino lehen Mertxe Gomez Kurdistanekin Elkartasuna elkarteko kideak.

Ospakizunaren mitologia

Sua piztu, eta hor hasten da kurduentzat urte berria. Mitologiak dioenez, duela milaka urte errege krudel bat bizi zen Tigris eta Eufrates ibaien artean. Hildako haurren gorpuekin elikatzen omen zen, eta herritarrak beldurtuta bizi ziren. Kawa errementariari, esaterako, hamazazpi seme-alabetatik hamasei kendu omen zizkion Zohak erregeak. Azken alaba eskatu zionean, ordea, ardi baten gorpuarekin engainatu omen zuen, eta alaba mendian gorde zen. Inguruko herrietako gurasoek Kawaren trikimailuaren berri izan zutenean, berdin jokatu zuten, eta haur horiek mendian eta aske hazi ziren. Errementariak, gainera, borroka egiten erakutsi zien.

Borrokarako prest zuen armada osatu zuenean, Zohaken gaztelura joan ziren denak eskuan zuziak zituztela, eta erregea akabatu zuten. Aro berri bat hasi zen horrela, eta, horregatik, sua piztuta irudikatzen dute urte berriaren hasiera kurduek. Baina urte berri baten hasiera baino gehiago ere bada Newroz ospakizuna, Gomezen ustez: «Erresistentzia irudikatzen du, eta, horregatik, urte luzetan jaia debekatuta egon da».

Kurdistanen bezala, Iran, Azerbaijan, Uzbekistan, Tajikistan, Turkmenistan, Pakistan eta Indiako gune batzuetan ere ospatzen dute Newroz. «Amed hirian ospatu zuten urte berria, baina segurtasun eta kontrol neurri handien artean», Gomezen arabera. Eta ospakizunak duen indarraren lekuko izan daiteke ekitaldian kontatu zutena ere: Turkiako armada Afrinen sartu zenean eraitsi zuten lehen monumentua Kawa errementeriari eskainitakoa izan zen. Horrek erakusten du, mitologia izanagatik ere, Newrozek duen indar sinbolikoa.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Sindikatuen agerraldia, gaur. ©BERRIA

Hezkuntza Sailak «planifikazio integralik» ez duela salatu dute sindikatuek

Gotzon Hermosilla

Ohartarazi dute «transmisio kasuak ugarituko» direla neurriak hartzen ez badira. Greba egunetik astebetera, adierazi dute ez dutela baztertzen beste mobilizaziorik egitea.

Osasungintzako sindikatuen protestak. ©Gorka Rubio/FOKU

«Hitzetatik ekintzetara pasatzeko» eskatu diote sindikatuek Osakidetzari

Maria Ortega Zubiate

SATSE, ELA, LAB, SME, CCOO, UGT eta ESK sindikatuek osasun sistemaren egoera hobetzeko neurriak hartu ditzala eskatu diete Osakidetzari. Adierazi dute neurriak hartu ezean mobilizazioekin jarraituko dutela.

Hainbat ikasle, ikasgeletara sartzeko zain, Bilbon. ©Luis Jauregialtzo / Foku

32 ikasgela itxi dituzte egun bakarrean Hego Euskal Herrian

Mikel O. Iribar

Ikasturtea hasi zenetik, 364 ikasgela daude itxita Hegoaldean. Guztira 231 ikastetxetan izan dira itxiera horiek.

PCR proba bat, Gurutzetako ospitalean. ©Luis Jauregialtzo, FOKU

Lehen aldiz, laurehun kasuren langa gainditu du Nafarroak

Uxue Rey Gorraiz

Beste 826 kasu atzeman dituzte Hego Euskal Herrian. Horietatik 421 Nafarroan detektatu dituzte. Positiboek goia jo dute lurralde horretan, eta hildako bat izan da. 497 lagun daude erietxean Hegoaldean: horietatik 81, ZIUetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna