Sektore feminizatuentzat 1.400 euroko gutxieneko soldata eskatu du LABek

Emakumeak gehiengo diren sektoreetan soldatak txikiagoak izatea da gaur egungo soldata arrakalaren arrazoi nagusietako bat. Hori zuzentze aldera, LABek eskatu du 1.400 euroko gutxieneko soldata bat ezartzekosektore feminizatuetan. Hori egiteko modu bat proposatu die Confebask eta CEN patronalei: lanbide arteko akordio baten bidez gutxieneko soldata hori finkatzea.

Hego Euskal Herriko bi patronal nagusietako Bilboko eta Iruñeko egoitzen aurrean bildu ziren atzo garbitzaileak, merkataritzako langileak, zaintzaileak eta jangeletako beharginak, LABek deituta. «Guztiak ezinbesteko langileak izan dira pandemian, baina 1.400 eurotik beherako soldatak dituzte», gogorarazi zuen sindikatu abertzaleak.

Bilbon, Confebasken egoitzaren aurrean, Maddalen Dorador LABeko zerbitzu pribatuen federazioko idazkariak nabarmendu zuen aberastasunaren banaketa dela gakoa: «Sortzen den aberastasuna modu justu batean banatzeko eskatzen dugu. Dirua egon, badago». Adibide bat jarri zuen banaketa hori okerra dela adierazteko: Ignacio Sanchez Galan Iberdrolako presidenteak zahar etxeetako 660 langilek beste irabazten du hilero, eta 799 garbitzailek adina. Zehazki, Sanchez Galanek 12,201 milioi euro patrikaratu zituen 2020. urtean —6,2 milioiko soldata eta beste sei milioi akzioetan—.

Iberdrolako buruaren soldata baino apalagoa eskatu du LABek sektore feminizatuetan: 1.400 euro hilean, edo urtean 19.600 euroko soldata garbia, hamalau ordainketa eginez gero. Ez da ausaz hautatutako kopurua, baizik etaEuskal Herriko batez besteko soldataren %60. «Zer gutxiago hori bermatzea baino. Gure lanak aitortu eta duintzeko eskatzen dugu. Patronalak zor bat dauka emakume langileokin, zor patriarkala. Bi aldiz aberastu da gure lanarekin, gure enplegu prekarioari esker, eta etxean musu truk egiten ditugun zaintza lanen kontura», azaldu du Doradorrek.

Beste aldarrikapen batzuk ere aurkeztu dizkie LABek Confebaski eta CENi: gehieneko lanaldia arautzea, soldata arrakala gainditzea eta lanaldi partziala mugatzea.

Bere aldarrikapena esparru politiko-instituzionalera ere eraman nahi du LABek. Horrela, Iñigo Urkullu eta Maria Txibite lehendakariei eskatu die esku hartzeko sektore feminizatuetan, soldata arrakalaren gaian patronalei presio egin diezaieten.