«Beranduenez abenduan» erabakiko du gobernuak ospitaleetako sukaldeaz

Mediterranearen kontratua amaitu baino lehen, hutsean uzteko aukera baztertu du Nafarroako Osasun kontseilari Fernando Dominguezek
Sukaldeak pribatizatu izana salatzeko protesta bat, Iruñean.
Sukaldeak pribatizatu izana salatzeko protesta bat, Iruñean. L. F. ARROIABE / ARP

Edurne Elizondo -

2015eko urriak 9
«Urratsak egiten ari gara». Horixe nabarmendu du Nafarroako Osasun kontseilari Fernando Dominguezek, parlamentuan, Nafarroako Ospitale Guneko sukaldeetako zerbitzua berriz ere publiko bilakatzeko prozesuari buruz. Ahal Dugu taldeko parlamentari Tere Saezek egin zion gai horri buruzko galdera, atzoko osoko bilkuran. Gobernua babesten duten taldeek akordio programatikoan jaso zuten auzi hori. «Ahal bezain pronto berriz ere publikoa izanen da zerbitzu hori; aukerak aztertzen ari gara, eta beranduenez abenduan hartuko dugu erabaki bat», azaldu zuen kontseilariak, atzo. Baztertu zuen, hala ere, Mediterranea de Catering enpresarekin duten kontratua amaitu baino lehen bertan behera uzteko aukera.

Gobernuaren eta Mediterranea de Catering etxearen arteko egungo kontratua 2016ko irailaren 23a bitarte egonen da indarrean. «Kontratua lehenago eteteak lege auzi bat ekarriko liguke enpresarekin; ez dugu argudio nahikorik kontratua hutsean utzi ahal izateko», erran zuen Dominguezek.

Aukera hori baztertuta, egoera aztertzeari ekin dio Osasun Departamentuak, erabaki bat hartu ahal izateko. Hasteko, egun enpresa pribatu baten esku dagoen zerbitzua berriz ere publiko bilakatzeak zenbateko kostua izanen duen aztertzen ari dira departamentuko kideak. «Hainbat gauza hartu behar ditugu kontuan; ikusi behar dugu sukaldea egun dagoen tokian uztea ote den aukerarik onena; bai eta egungo ekipamendua eros dezakegun ere; langileak trebatu beharko ditugu, halaber, Mediterraneak erabiltzen duen sistema ez baita lehen sukaldeetan erabiltzen zuten bera».

Arazoak, hasieratik

2013 urteko urtarrilean hasi zen Mediterranea de Catering Nafarroako Ospitale Guneko menuak prestatzen, eta lehendabiziko egunetik jaso zituen kritikak. Batetik, pribatizazioak hamaika langile karrikan utzi zituelako; bertzetik, enpresa horrek banatzen zituen menuen kalitateagatik eta kantitateagatik. Gaixoek hasieratik egin zuten protesta. Haien haserrea areagotu duten gertaerak jazo dira, gainera: torloju bat agertu zen behin plater batean; bertze batean, bakterioak antzeman zituzten menuetan... Hainbat isun jaso ditu Mediterranea de Catering etxeak, baina lanean jarraitzen du. Eta lanean jarraituko du, 2016ko iraila bitarte.

Sukaldeetako zerbitzua pribatizatu izana «erabaki tamalgarritzat» jo zuen Ahal Dugu taldeko Tere Saezek, eta nabarmendu zuen jatekoa ere badela gaixoak sendatzeko prozesuaren parte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna